Kuphelile ukuchanasa kweProteas kweyamaTest kuNew Zealand
Kuphele nya ngerekhodi leProteas lokungadliwa yiNew Zealand emidlalweni yochungechunge lwamaTest.
Namuhla ekuseni, iProteas idliwe iBlack Caps ngamawikhethi ayisikhombisa emdlalweni wesibili weTest obuseSeddon Park kwelaseNew Zealand.
Kowokuqala elakuleli laguqa ngama-run angama-281 eBay Oval. IBlack Caps inqobe lolu chungechunge lwemidlalo emibili yamaTest ngo-2/0.
IProteas ibingakaze idliwe yiNew Zealand emdlalweni yochungechunge lwamaTest.
Namuhla iBlack Caps iqedile ngokucanasa kweNingizimu Afrika. Elakuleli belidlala ngaphandle kwezihlabani zabadlali okubalwa kubona uKagiso Rabada, uLungisani Ngidi, uTemba Bavuma, u-Aiden Markram, uNandre Burger noKeshav Maharaj.
Bonke bebeyingxenye yeBetway SA20 edlale kanye kanye nalolu chungechunge lwemidlalo emibili yamaTest.
IProteas ingene osukwini lwesine enenhlasi yethemba lokumangaza iBlacks. Ibidinga amawikhethi ayisishiyagalolunye ukuze inqobe. Ngakolunye uhlangothi iNew Zealand ibibheke ukwenza ama-run angama-227 kuma-over ali-198 ukuze iphumelele.
Ibe nezinsuku ezimbili zokuthola lesi sibalo sama-run. Ngosuku lwesithathu ilahlekelwe yiwikhethi kaDovan Conway okhishwe nguDaine Piedt ngebhola lokugcina osukwini esenze ama-run ali-17.
Ekuqaleni kosuku lwesibili uTom Latham ujoyinwe nguKane Williamson ongene wadlala ingcwenga yekhilikithi.
Ukhombisile ukuthi usengubhuti omdala kweyamaTest. Uphinde wacacisela abashwibi beProteas ukuthi basangamavukane ezingeni lomhlaba.
Ushaye ama-run alii-133 emabholeni angama-260 engazange akhishwe. Osukwini lwesine iBlack Caps ilahlakelwe ngamawikhethi amabili. Kuphume uLatham nge-over ka-19.5.
Ukhishwe nguPiedt wabanjwa nguZubayr Hamza enama-run angu-30. URachin Ravindra uphinde wakhishwa nguPiedt. Yena ubesehlanganise ama-run angama-20.
UWilliamson noWill Young abazange batatazele ngokuwa kwamawikhethi phambi kwabo. Bayincenge njalo baze bayoshaya intambo.
UWilliamson akazange akhishwe enama-run angama-133 kwathi uYoung naye wangaphuma enama-run angama-60. INew Zealand igcine inqobe ngamawikhethi ayikhombisa yanqoba uchungechunge lwemidlalo emibili yamaTest ngo 2-0.
