ULorch nejoka elinzima lokuthela ngehlazo iPirates
Angase ahlukumeze iqembu elimtakule kunzima umdlali omusha weMamelodi Sundowns uThembinkosi “Nyoso” Lorch.
Lesi sihlabani somdlali sijoyine iSundowns sisuka ku-Orlando Pirates njengoba bekuvulwe iwindi lokuhwebelana ngabadlali ngoMasingana.
Usayine inkontileka yeminyaka emihlanu kuSundowns. ULorch ufike kweZimnyama ngowezi-2015 esuka kuMaluti FET College.
EZimnyama zambona ngesikhathi iMaluti ibhubhisa iPirates ngama-4/1 kuNedbank Cup. Ngemuva kwalokho zimsayinisile zabuye zambolekisa kuyona iMaluti isizini eyodwa.
Ngesizini yowezi-2015 ubolekiswa kuCape Town All Stars kwathi ngesizini elandelayo watshelekiswa kuChippa United. Ngowezi-2017, iPirates imbuyisile.
Ufike waphenduka isithandwa sabalandeli. Ugcine ephenduka isilomo nakuBafana Bafana.
Ngesizini yowezi-2019, uqokwe njengomdlali ovelele kuPremier Soccer League (PSL).
Ubevutha engabaselwe. Nguyena owasiza iBafana yakhipha elaseGibhithe ku-Africa Cup of Nations ngowezi-2019 ekubeni bengosokhaya. ULorch wavalela enethini igoli elafaka iBafana kuma-quarterfinal ngesikhathi iqumba phansi oFaro ngo 1-0 eCairo International Stadium.
NgoMgqibelo ngo-8 ebusuku, eZimnyama zizotholana phezulu neSundowns emdlalweni weDSTV Premiership ozoba seLoftus Versfeld Stadium, ePitoli.
Lo mdlalo ubhekwe ngamehlo abomvu. ULorch uzobhekana okokuqala nePirates selokhu ethathe isinqumo sokuyishiya ngoMasingana.
IBhakaniya limseke kakhulu uLorch kade ebhekene necala lokuhlukumeza owesifazane ayithandana naye. Waphinde wabulala nempahla.
IPirates imseke kwaze kwabayisekugcineni uLorch kuleli cala elibucayi abebhekene nalo.
Ugcine egwetshe iminyaka emihlanu engaphandle wase ehlawuliswa isamba sika-R100 000.
Abalandeli bamenzele kwalula kakhulu. Bamvotele kabili njengomdlali ovelele kuCarling Knockout Cup. Uhlabane ngo-R100 000 ababili.
NgoMgqibelo uLorch ubhekene nesimo esinzima lapho kumele ahlukumeze abalandeli bePirates nezikhulu zayo ezimseke kunzima.
