UWilliams uthi sesakhiwe isisekelo kuBafana Bafana
Ngathi uyaphupha ukaputeni weBafana Bafana uRonwen Williams uma ecabanga ngempumelelo yeqembu lesizwe ku-Africa Cup of Nations (Afcon).
IBafana iqede endaweni yesithathu ku-Afcon ngemuva kokuthela othulini iDRC Congo ngo 4-2 sekukhahlelwa amaphenathi ngempelasonto eStade Bouake e-Ivory Coast.
Ngemuva kwalokho iBafana ihlabane ngendondo yethusi. Kulo mqhudelwano imangaze izinkumbi zabalandeli bebhola likanobhutshuzwayo iqumba phansi iMorocco ku-last 16.
I-Atlas Lions ibikleliswe endaweni yokuqala e-Afrika kanti emhlabeni iyibambe endaweni yeshumi nantathu.
Kuma-quarterfinal, uWilliams uqophe umlando evimba amaphenathi amane. Ube ngunozinti wokuqala emlandweni webhola likanobhutshuzwayo ukuzuza lokhu. Ukwenze iBafana ibhekene neCape Verde.
Exoxa nabezindaba namuhla ekuseni esikhumulweni sezindiza i-OR Tambo International Airport, eGoli udalule ukuthi namanje kusenzima ukukholwa abakwenze ku-Afcon.
“Namanje angikakholwa izimanga esizigile ku-Afcon. Sisazama ukukhohlwa ukuthi ngempela yithina esenze isizwe saziqhenya. Impela esikwenzile ngathi yiphupho. Imiyalezo siyitholile. Amarekhodi esiwaqophile nawo siwabonile. Ngiyaziqhenya ngale mpumelelo. Ukubambisana yikona okusenze saphumelela. Ukuba yimbumba yikona okwenze sahamba ibanga elide. Bangenzele umsebenzi walula njengokaputeni,” kuchaza uWilliams.
IBafana ayizange iqale kahle ku-Afcon. Kowokuqala yathelwa othulini yiMali ngo 2-0 kodwa yavuka yazithatha. Kowesibili ibhaxabule iNamibia ngo 4-0 kwathi wokugcina wamaqoqo yabambama neTunisia ngo 0-0.
“Ngemuva kokudliwa yiMali akekho obhekise ikhanda phansi. Yebo sasiphatheke kabi kodwa asizange silahle ithemba. UNgqongqoshe uZizi Kodwa wayekhona wazibonela ezindlini zokushintshela. Amajita ayesanawo umuzwa wukuthi sizokwenza kahle futhi sisengahamba size sifinyelele kowamanqamu. Lokhu kwasidweba sacaca isithombe sokuthi sibophele iqembu elilwayo futhi aliphokophele empumelelweni,” kuqhuba uWilliams.
Bekungokokuqala eminyakeni engamashumi amabili nane iBafana ifinyelela kowandulela amanqamu e-Afcon.
“Sesisakhile isisekelo seBafana Bafana. Umgqigqo ngowethu. Okumqoka manje wukubamba lo mgqigqo. Kumele siqhubeke nokulwa sizuze okungaphezu kwalokho.” kuphetha uWilliams.