Umvimbi phezu kwezibazi iNigeria ikhipha iBafana

• Nigeria (0) 1
• Bafana Bafana (0) 1
• INigeria inqobe ngama-4/2 sekukhahlelwa amaphenathi

INigeria iqhubekile nokuphendula iBafana Bafana ithofi layo yenza isiqiniseko sokuthi iNingizimu Afrika iyahluleka wukuqeda isinyama seminyaka engamashumi amabili nesithupha izabalazela ukuphinde idlale kowamanqamu e-Africa Cup of Nations (Afcon).

Izolo, iNingizimu Afrika iguqiswe yiNigeria ngama-4/2 sekukhahlelwa amaphenathi kulo mdlalo ophele ngelilodwa nxazombili eStade Bouake kwelase-Ivory Coast.

IBafana yagcina ukudlala kowamanqamu ngowezi-1998 ngesikhathi ithelwa othulini i-Egyt ngama-2/0 kowamanqamu eBurkina Faso.

Kusukela lapho, iBafana ayikaze iphinde ifinyelele kowamanqamu. Izolo ibibheke ukuqeda lesi sinyama seminyaka engamashumi amabili nesithupha.

Bekungokwesithathu iSuper Eagles ishiywa kukhalwa eNingizimu Afrika ku-Afcon. Ngowezi-2000 yakhipha iBafana kowandulela amanqamu enqoba ngama-2/0 eLagos kwathi ngowezi-2004 eTunisia yaxebula elakuleli ngama-4/0 kweyamaqoqo. INigeria iphinde yenze iBafana isilo sengubo ngowezi-2019 e-Egpt. Yawashisa iBafana ijezi kuma-quarterfinal iphumelela ngama-2/1.

ISuper Eagles yiyona evule inkundla. UMothobi Mvala udlalise kabi uVictor Osimhen ngomzuzu wama-64. Ukaputeni uWilliam Troost Ekong uyivalele enethini ngowama-67.

Kuthe seliyoshona kwaqhamuka uTeboho Mokoena walamulela iBafana evalela enethini iphenathi ngomzuzu wama-90.

Bekudlaliswe kabi uPercy Tau ebhokisini. Unompempe u-Anim Omar akazange ayibone kwazise iNigeria iqhubekile yadlala. Ifike ebhokisini leNingizimu Afrika yashaya elesibili. Livalwe enethini ngu-Osimhen kodwa iVAR yamphuca leli goli. 

Umdlalo ubuyiselwe emuva lapho kudlalwe khona kabi uTau. UMokoena ukhombise isibindi esukuma eyinamathelisa enethini umdlalo waqonda ngqo ku-Extra Time.

UKhuliso Mudua uyeke uqekelele ngethuba lokugcina ngaphambi kokuthi kuphele umdlalo. Bekukade kuyi-free kick ebishaywe nguMokoena kwathi uStanley Nwabili wayichithela kuMudau olibhamuze phezu kwepali. 

Umdlalo udlulele ku-Extra Time. IBafana iqede umdlalo ingasaphelele. UGrant Kekana uthole ikhadi elibomvu ngomzuzu we-114. Umqeqeshi weBafana Bafana uHugo Broos ukhiphe uZakhele Lepasa wafaka uNkosinathi Sibisi ukuzovala indawo kaKekana.

Kumaphenathi uNwabili ubeyiqhawe evimba amaphenathi amabili eBafana ebeshaywe ngu-Evidence Makgopa noMokoena. INigeria ithungatha isicoco sayo sesine se-Afcon. Izodlala nozonqoba ne-Ivory Coast kowamanqamu ngeSonto ngele-10 ebusuku e-Olympic Stadium of Ebimpé. IBafana isizobanga indawo yesithathu neDRC ngoMgqibelo ngele-10 ebusuku eStade Bouake.