ISekhukhune ibheke ukubuyisa izinduku kweZimnyama
Alikho iqembu elizofuna ukugoba uphondo zisuka amadaka
Kuzovuka amagqubu kuma-Quarterfinal eMTN8 kule mpelasonto. Amaqembu ayisishiyagalomboli aqede phezulu kulogi yeDSTV Premiership ngesizini edlule azoqala umshikashika wokubanga isamba sika-R8 million.
I-Orlando Pirates iyona evikela isicoco. Ngesizini edlule iguqise AmaZulu ngo 1-0 kowamanqamu eMoses Mabhida Stadium, eThekwini. EzikaMagebhula zizodudulana neSekhukhune United e-Orlando Stadium ngoMgqibelo ngo-3 kuma-quarterfinal alo mqhudelwano ohamba nezindodla zemali. Kulo mdlalo kuzovuka amagqubu ngenxa yokuthi eZimnyama zigile iBabina Noko kowamanqamu weNedbank Cup ngesizini edlule. IPirates yathela othulini iSekhukhune ngo 2-1 eLoftus Versefeld Stadium yase idla ubhedu kuNedbank Cup.
Lokhu kwenze iBabina Noko yaphuthwa yingqayizivele yethuba lokuhlabana ngesamba sika-7 million.
Kulokhu leli qembu laseLimpopo akungatshazwa ukuthi lizobe libheke ukuphendula amatafula. Ngakolunye uhlangothi eZimnyama zizobhekisa amabombo kulo mdlalo zihambela phezulu kulandela ukubhudluza iRoyal AM ngo 4-2 phakathi nesonto emdlalweni weligi obuse-Orlando. ISekhukhune iqale isizini ngegiya eliphansi iguqiswa yiMamelodi Sundowns ngo 2-1 ePeter Mokaba Stadium, ePolokwane, eLimpopo.
Kwenye iQuarterfinal, iSundowns izoshukana neSwallows komunye umdlalo wamagqubu.
USteve Komphela usanda kushiya kuBafana Ba Style ujoyine iSwallows. Kuvela izindaba zokuthi isimo phakathi kwakhe nomqeqeshi weqembu kuSundowns uRhulani Mokwena bese simuncu.
UMokwena kuthiwa utshele izikhulu zeSundowns ukuthi ufuna ukuzikhethela ithimba lakhe labaqeqeshi azosebenza nalo.
Lokhu akuzange kuhlale kahle kuKomphela othathe isinqumo sokushiya kuSundowns wajoyina iSundowns.
UKomphela uzobhekana neSundowns okokuqala selokhu eyishiyile uma la maqembu esetholana phezulu kusasa ngo-6 ntambama eLoftus Stadium, ePitoli.
Kuwona lo mdlalo amehlo azophinde athi njo ku-Andile Jali obegijima kuSundowns. UJali uhambe kuleli qembu sekukubi. Akazange ayiqede isizini. Usolwe ngokufika ejimini edle izinkamba zikaFaro okuholele ekutheni iqembu limmise.
Liphethe ngokuthi ligcine liyanqamula inkontileka yakhe. Nendondo yokunqoba isicoco seligi akazange ayinuke.
UJali uhlalelwe yijoka lokushaya into ecokeme uma esebhekene neSundowns.
IKaizer Chiefs izobhekana neCape Town City. UMduduzi Mdatsane uzobe ebheke ukuphula izinhliziyo zabalandeli beCitizens abegijima kuyona.
Udlale okokuqala egqoke imifaniswano yaMakhosi ngeledlule ngesikhathi ebambana neChippa United eMabhida koweligi.
Isiyonke imidlalo yeMTN 8 iqhathwe kanje
Kusasa ngoMgqibelo
- IMamelodi Sundowns vs Swallows eLucas Masterpieces Stadium ngele-15:00
- I-Orlando Pirates neSekhukhune United e-Orlando Stadium ngele-18:00
NgeSonto
- ICape Town City neKaizer Chiefs e-Athlone Stadium ngele-15:00
- ISupersport United neStellenbosch FC ePeter Mokaba Stadium ngele-18:00
