Ihlulwe ukwenza i-U/19 yekhrikhethi yakuleli kweyomhlaba

Kuphelile ngephupho leNingizimu Afrika lokuqukula iNdebe YoMhlaba ngaphansi kwabaneminyaka engaphansi kweshumi nesishiyagalolunye. 

Elakuleli yilona ebelisingethe lo mqhudelwano. Kweyamaqoqo beliboshelwe eqoqweni elilodwa ne-England, iWest Indies neScotland.

Liqede liqhwakele ngamaphuzu amane emidlalweni emithathu ngemuva kwalokho ladlulela kuSuper Six. 

Kweyamaqoqo lidliwa i-England ngama-run angama-36 ngaphansi kohlelo lweDuck-Worth-Lewis-Method (DLS) kulo mdlalo owathi ukuthikanyezwa yimvula.

INingizimu Afrika ishaye iWest Indies ngama-run angamashumi amathathu nanye kwathi kowokugcina yathela othulini iScotland ngamawikhethi ayisikhombisa.

KuSuper Six, uMzansi uqumbe phansi iZimbabwe neSri Lanka. Namuhla utomule elaseNdiya. UMzansi ukhale ngaphansi ngamawikhethi amabili.

Elakuleli yilona elibhethe kuqala. Lihlanganise ama-run angama-244 kusawe amawikhethi ayisikhombisa kuma-overs angama-50 eSahara Park Willowmoore Cricket Stadium.

ULhuan-dre Pretorius wakhele iNingizimu Afrika isisekelo eshaya ama-run angama-76 kwathi uRichard Seletswana wamlekelela ngama-run angama-64. Amawikhethi elaseNdiya athathwe nguRaj Limbani owise amathathu, uMusheer Khan ohlomule ngamabili noKumar Pandey othathe eyodwa.

i-India ijahe lesi sibalo sama-run sekusele amabhola ayisikhombisa. UKwena Maphaka noTristan Luus bazamile ukumisa kabi elaseNdiya bethatha amawikhethi amathathu umdlalo ngamunye.  USachin Dhas no-Uday Saharan yibona abaweze iNdiya ngelibanzi. Bashaye u-95 no-81 ngokulandelana.

I-India isizobhekana nozonqoba phakathi kwe-Australia nePakistan abazotholana phezulu ngoLwesine ngo-10 ekuseni eSahara Park Willowmoore Cricket Stadium.

Umdlalo wamanqamu uzodlalwa ngeSonto ngele-10 ekuseni eWillowmoore Cricket Stadium.