I-EU yethule uhlelo olusha lokuthola igesi e-Afrika
UNdunankulu wase-Italy uGiorgia Meloni wethule uhlelo lokusebenzisana ngoMsombuluko, okuhloswe ngalo ukuqinisa ukubambisana ne-Afrika, ukunqanda ukufuduka kwabantu abavela kwamanye amazwe ngokufukulwa kwezomnotho, kanye nokusungula isizinda samandla se-European Union. Kodwa i-African Union (AU) ithe amazwe angamalungu ayo awazange athintwe ngaphambi kokuba kukhishwe isimemezelo esisemthethweni.
Uhlelo i-Meloni Mattei Plan, oluqanjwe ngo-Enrico Mattei, umsunguli wenkampani yezamandla ephethwe nguHulumeni wase-Italy i-Eni, lwamenyezelwa engqungqutheleni ebiseRome ebihanjelwe abaholi abambalwa base-Afrika.
I-Italy ithembise ukuthi izonikela ngama-euro ayizigidigidi ezi-5.5 (amaDollar ayizigidigidi ezi-5.95) ngaphansi kwalolu hlelo, ngaphezu kwamaphrojekthi akhona agxile ekuguqukeni kwesimo sezulu kanye nokuthuthukiswa kwamandla ahlanzekile e-Afrika. Lokhu kuzobona i-Rome ithenga futhi inikezela ngegesi yemvelo kuyo yonke i-EU.
Uhhafu wesabelomali uzovela esikhwameni sesimo sezulu esasungulwa ngowezi-2022 ukuze sixhase ngezimali amaprojekthi amazwe ngamazwe ngokuhambisana neSivumelwano saseParis, okusho ukuthi lezi yizimali ezihlosiwe. Ezinye izimali zizokhishwa njengemalimboleko, iziqinisekiso, kanye nezibonelelo.
UNdunankulu wase-Italy ubale amaphrojekthi asukela eMorocco kuya eMozambique, athe azokwenza ukuthi i-Afrika ibe ngumhwebi omkhulu wamandla ku-EU futhi isize ekudambiseni ukuthembela kwayo emandleni aseRussia phakathi kwezijeziso ezabelwa iMoscow ngenxa yokungqubuzana kwayo ne-Ukraine okuqhubekayo.
Kodwa-ke, enkulumweni yakhe engqungqutheleni ye-Italy ne-Afrika, uSihlalo we-AU uMoussa Faki Mahamat uthe amazwe ase-Afrika angathanda ukuthi kukhulunywe nawo ngaphambi kokwethulwa kwalolu hlelo.
“I-Afrika izilungiselele ukudingida izici nezindlela zokuqaliswa kwe-Mattei Plan. Kumele ngigcizelele, lapha, isidingo sokufanisa izenzo namagama akhulunywayo. Uzokuqonda ukuthi ngeke saneliseke ngezethembiso ezihlale zingafezeki,” kusho uMahamat.
Inhloko yamazwe angama-55 angaphansi kwe-AU icele i-Italy ukuthi ihlanganyele nezwekazi “ngemodeli entsha yobambiswano ebonisa indlela eya emhlabeni onobulungiswa,” imemezela ukuthi “i-Afrika ayiluleki izandla zayo kubalingani njengodibi.”
I-EU isiphendukele e-Afrika ifuna omunye umthombo wamandla njengoba izabalaza ukushiya igesi yaseRussia. Ngonyaka odlule, uShansela waseJalimane u-Olaf Scholz wavakashela eNigeria futhi wenza isiphakamiso sesinyathelo esihlanganyelwe sokwakha imakethe yegesi etholakala emnothweni omkhulukazi wase-Afrika.
UVsevolod Sviridov, uchwepheshe eSikhungweni Sezifundo Zase-Afrika eNyuvesi yaseRussia i-HSE, ukholelwa ukuthi i-EU ngeke ikwazi ukukhipha igesi eningi e-Afrika. Lokhu kungenxa yokuthi abathumeli begesi ezwenikazi, okuhlanganisa neNigeria, babhekana nezinselelo zabo, njengokuhlangabezana nezidingo zokusetshenziswa kwasekhaya, kubeka umbhalo kaSviridov oshicilelwe yi-RT.
NgokweHSE Center for African Studies, ukuthunyelwa kwegesi kwe-Afrika kusuka e-Afrika kuya ku-EU kwaba nengqikithi yama-cubic metres ayizigidigidi ezingama-72 ngowezi-2022, ukwehla okungaba ngama-cubic metres ayizigidigidi ezimbili kusukela ngonyaka odlule.