Ithuba lendebe kosokhaya be-Afcon

I-Ivory Coast izibeke ethubeni lokujoyina uhla lwamazwe azakhele igama edla ubhedu ku-Africa Cup of Nations (Afcon) engosokhaya.

I-Elephants ingene esigabeni somkhumulajezi ngomcicimezelo. Ingene namazwe aqede endaweni yesithathu.

Kweyamaqoqo elase-Ivory Coast lidliwe imidlalo emibili lanqoba owodwa. Lithela othulini iGuinea Bissau ngo 2-0.

Ngemuva kwalokho kulandele isibhaxu. Linabiswe yiNigeria ngo 1-0 kowesibili kwathi kowesithathui yathelwa ngehlazo lika 4-0.

Ku-last 16 avele atomula iSenegal. Afike ayimangaza eyiguqisa ngo 5-4 sekukhahlelwa amaphenathi emdlalweni ophele ngo 1-1 ngemuva kwemizuzu eli-120.

NgoMgqibelo ngeles-7 ebusuku, i-Elephants izobhekana neMali eStade Bouake emdlalweni we-quarterfinal yesithathu ye-Afcon.

I-Ivory Coast ibheke ukulandela emazweni afana ne-Egypt, i-Ethiopia, iGhana, iNigeria, i-Algeria, iNingizimu Afrika, iSudan neTunisia.

OFaro baba yizwe lokuqala ngowe-1959 ukunqoba i-Afcon njengosokhaya. Kwalandela i-Ethiopia ngowe-1962 kwathi ngowe-1963 kwaba yiGhana.

IBlack Star ilandelwe yiNigeria (1980), i-Egypt (1986), i-Algeria (1990), iNingizimu Afrika (1996), iTunisia (2004) ne-Egypt ngowezi-2006.

Sekuphele iminyaka eyishumi nesishiyagalombili kwagcina ukuba nezwe eliphakamisa i-Afcon phambi kwalandeli balo ezweni lalo.

IGhana, i-Angola, iGabon, i-Equatorial Guinea, iNingizimu Afrika, i-Egypt neCameroon bonke bahlulekile wukunqoba i-Afcon bengosokhaya.

I-Elephants inethuba lokuqeda leli shobolo leminyaka eyishumi nesishiyagalombili.