Iyavuthwa indlela yeNigeria ebheke empumelelweni

Izolo ebusuku ama-Super Eagles athele othulini iCameroon ngo 2-0 emdlalweni obuseFélix Houphouët-Boigny kwelase-Ivory Coast.

Amagoli eNigeria avalelwe enethini ngu-Ademola Lookman. Ngomzuzu wama-36, lo mdlali ogijima ku-Atantalata yase-Italy uvule inkundla.

Ngomzuzu wokugcine sekuzophela umdlalo uqinisekise indawo yama-Super Eagles kuma-quarterfinal evalela enethini igoli lakhe lesibili.

INigeria ijoyine i-Angola kuma-quarterfinal. Yona (Angola)iguqise iNamibia ngo 3-0 komunye umdlalo we-last 16.

Ama-Super Eagles agaqele isicoco sawo sesine se-Afcon. Aphakamisa esokuqala ngowe-1970 kwathi esesibili asiqubula ngowe-1994 kwelaseTunisia.

Esesithathu isiwine eNingizimu Afrika ngowezi-2013. Selokhu kuqale lomqhudelwano kwelase-Ivory Coast le lizwe alikaze lihlulwe.

Kowokuqala ibambane ngo 1-1 ne-Equatorial Guinea kwathi kowesibili yaguqisa osokhaya i-Ivory Coast njengoba kowokugcina idle iGuinea Bissau ngo 1-0.

Ngowezi-2019, iNigeria yafinyelela kowamanqamu kodwa yakhala ngaphansi ku-Algeria.

Kulokhu izobe ibheke ukudla esine bese ijoyina iGhana eyibambe endaweni yesithathu ohlwini lwamazwe asashaya ngezicoco eziningi ze-Afcon.

Ama-Black Stars anezine. ElaseGibhithe yilona elihlezi phezulu ngezicoco eziyisikhombisa bese lilandelwa elaseCameroon ngezinhlanu.