Useshoda ngokunqoba i-Afcon uMshishi
Useshoda ngesicoco se-Africa Cup of Nations (Afcon) umdlali weMamelodi Sundowns uThemba “Mshishi” Zwane.
Selokhu kuqala i-Afcon kwelase-Ivory Coast lomdlali odabuka elokishini laseTembisa, eGoli uvutha engabaselwe.
Useqokwe njengomdlali ovelele imidlalo emibili ilandelana. Udlale ingcwenga yebhola ngesikhathi iBafana Bafana ititinya iNamibia ngo 4-0 emdlalweni wamaqoqo e-Afcon.
Kulo mdlalo ubhakuzise enethini amagoli amabili emdlalweni. Amanye abhanjiswa ezintanjeni nguThapelo Maseko noPercy Tau.
UMshishi uphinde wenza into yamehlo, iBafana idudulana neTunisia emidlalweni wokugcina wamaqoqo ogcine uphele ngo 0-0.
Lo mdlali oneminyaka engu-34 ubudala usezinqobe zonke izicoco neMamelodi Sundowns.
Ngaso sonke isikhathi uhlale efaniswa nengwazi yeBafana neKaizer Chiefs, uDoctor “16V” Khumalo.
Ngowezi-1996 ngesikhathi iBafana ikhala yemuka nesicoco se-Afcon eNingizimu Afrika, uKhumalo wabamba elikhulu iqhaza.
Nguyena owakhipha amaphasi amabili athola uMark Williams owashiya enethini amagoli amabili iBafana iqumba phansi iTunisia ngo 2-0 eFNB Stadium, eGoli.
UZwane unyuselwe eqenjini elikhulu leSundowns ngowezi-2011 esuka eqenjini elincane lamaBrazilians ebelaziwa nge-ALS Puk Tawana.
KuSundowns usenqobe izicoco zeligi eziyisishiyangalombili, ezintathu zeNedbank Cup, eseMTN8 nezimbili zeTelkom Knockout.
UMshishi uphethe nesicoco seCaf Champions League ayiphakamise neSundowns ngowezi-2016. Ngemuva kwalokho unqobe eseCaf Super Cup ezakhe ziguqisa iTP Mazembe ngowezi-2017.
KuPremier Soccer League (PSL), useke waqokwa njengomdlali ovelele amahlandla amabili.
UZwane osekwenze konke neSundowns. Into aseshoda ngayo yisicoco se-Afcon. NgoLwesibili uzophinde athwale ijoka lokuweza iBafana ngelibanzi uma isishukana neMorocco ekleliswe endaweni yokuqala e-Afrika emdlalweni we-Last 16 ye-Afcon ozoba seStade de San Pedro ngo-10 ebusuku.
IBafana sekuphele iminyaka engamashumi amabili nesishiyagalombili ihlulwa wukuphakamisa isicoco se-Afcon.
Selokhu yagcina ukuphakamisa lesi sicoco ngowe-1996 ngesikhathi ingosokhaya. Ngoww-1998, idliwe elaseGibhithe kowamanqamu kwelaseBurkina Faso.
Amathemba eBafana ahlezi kuThemba Zwane osefunisa okwetoho isicoco se-Afcon.