Oxoshwe wuSuthu uzama inhlanhla kumaRockets

Uzama inhlanhla kwiTS Galaxy Football Club, uSiphesihle Maduna ochithwe AmaZulu Football Club.

UMaduna uke wakhonjwa kuKaizer Chiefs ekuqaleni kwesizini. Inkontileka yakhe noSuthu iyaphela uma kuphela isizini.

Ngomzuliswano wokuqala akazange adlale nowodwa umdlalo. Ubengasazilolongi neqembu.

UMaduna ubesejima nabadlali abangekho ezinhlelweni zomqeqeshi weqembu uPablo Martin.

ElaboHlanga lithole izindaba zokuthi uMaduna uzama inhlanhla kumaRockets.

“UMaduna useGoli kuTS Galaxy. Uyahlolwa kuleli qembu. Uma ithimba labaqeqeshi ligculisekile ngekhono lakhe iGalaxy izoxoxisana naMaZulu bese yenza isivumelwano,” kubeka umthombo ongashayi nangephutha eceleni.

Emasontweni edlule Usuthu lukhiphe izincwadi lunika abadlali libazisa ukuthi lusezinhlelweni zokudiliza.

Phakathi kwabadlali abathole lezi zincwadi kukhona uMaduna, Mswati Mavuso, Mxolisi Kunene, Sibusiso Mabiliso noMfanafuthi Mkhize.

“UMavuso noKunene kuphele asebesele manje. Bonke abadlali bavumile ukunqamula izinkontileka zabo. UMavuso noKunene abadlali bafuna imali ecacile uma iqembu lizimisele ngokubakhulula. UPedro Dias uxhumane nezimenenja zabo wacela ukuthi zimtshele ukuthi yimalini abayifunayo ukuze kuhlukanwe. Nangempela izimenenja zabo zibabhalele kodwa abakaphenduli kuze kube yimanje,” kuchaza umthombo.

Iwindi lokuhwebelana ngabadlali liyavalwa ngoMgqibelo eNingizimu Afrika.