Ezika Mahrez zihlulekile ukudlulela kweyomkhumulajezi


Iphinde yayoqa amasakana ayo yagoduka ekuseni ihlandla lesibili kulandelana esigabeni samaqoqo i-Algeria ku-Africa Cup of Nations (Afcon).
I-Algeria edle umhlanganiso ku-Afcon ngowezi-2019 idliwe yiMauritania ngo 1-0 emdlalweni wokugcina kweyamaqoqo obuseStade Bouaké.
UDellahi Yaly ushaye ingcwenga yegoli ngomzuzu wama-37. Leli goli yilona eligcine lingcwabe i-Algeria.
Ngowezi-2021, leli zwe eliqhamuka Enhla ne-Afrika laphuma esigabeni samaqoqo kwelaseCameroon.
I-Algeria iqede ekugcineni eqoqweni layo ngamaphuzu amabili ngemuva kwemidlalo emithathu. Kowokuqala ibambane ne-Angola ngo 1-1 kwathi kowesibili yaphinde yacazelana amaphuzu neBurkina Faso idlala ngokulingana ngo 1-1.
Kwale ngisho isifake isihlabani sayo uRiyaad Mahrez ngesiwombe sesibili. IMauritania iziqophele umlando kulo mqhudelwano. Ibiqala ukunqoba umdlalo ku-Afcon. Njengamanje isethubeni elihle lokudlulela esigabeni somkhumulajezi. Iqede endaweni yesithathu. Amazwe amane aqede endaweni yesithathu ngamaphuzu angcono azodlulela ku-last 16.
Ngakolunye uhlangothi i-Angola iguqise iBurkina Faso ngo 2-0. Igcine iqede esicongweni ngamaphuzu ayisikhombisa emidlalweni emithathu. Ama-Stallions ayibambe kweyesibili ngamaphuzu amane.