MINWANA PHEZULU: Ayikazimiseli ngokudedela amaphuzu
IMamelodi Sundowns ayizimisele ngokulahla amaphuzu kule sizini ka-2023/24.
Ngemuva kwemidlalo eyishumi leli qembu seliqoqe amaphuzu angamashumi amathathu.
Namuhla ebusuku, AmaZulu ajoyine uhla lwamaqembu asedliwe yiSundowns kule sizini.
IBrazilians inqobe ngo 1-0 wegoli likaLucas Ribeiro alivalele enethini ngesiwombe sokuqala kulo mdlalo weDSTV Premiership obuseKing Zwelithini Stadium, eMlazi.
UMbongeni Gumede ubambe uThemba Zwane ebhokisini kwathi uRibeiro wathatha ibhola walivalela enethini ngomzuzu wamashumi amabili nanye.
Ngemuva kwale phenathi kusuke uthuthuva uRhulani Mokwena bejikijelana ngamazwi noPlablo Martin.
Bebefuna ukubambana ngamawashingi kodwa balanyulwa. Umdlalo uqhubekile kodwa ubusudle ngezikhwepha. UTaariq Feilies uke wadlala kabi uMarcelo Allende. Abadlali boSuthu bahlasele unompempe bagcina belanyulwa yintwana u-Olwethu Mzimela.
La baqeqeshi baphinde baqhubekile nempi yabo ebhentshini. UMokwena weqe ulayini waya ebhentshini loSuthu kodwa bavimba.
Ngemuva kwalokho ukhumule ijakhethi abeyigqokile umbona ukuthi useyilungele impi. Ibhentshi loSuthu lubanjwe nguRamahlwe Mphahlele obesebhentshini.
Ngalowo mzuzu abalandeli boSuthu baqale ingoma ethi ‘akuliwe bakuliwa pho kulindwe bani’.
UMzimela ubambe ibhola likaPeter Shalulile ngomzuzu wamashumi amabili nanye. Lo nozinti ogijima eqenjini lesizwe lika-Under-23 udlala umdlalo wakhe wokuqala ezingeni elikhokhelayo.
Sebebheke ezindlini zokushintshela imimoya ibuye yehla kwazise babonakale begaxana base bembambathana emhlane ukukhombisa ukuthi sebekhumelene umlotha.
Ngesiwombe sesibili iSundowns izamile ukuthola igoli lesibili kodwa uMzimela wala ezintini.
ISundowns isivule igebe lamaphuzu amahlanu phakathi kwayo neCape Town City ehlezi endaweni yesibili.
ICitizen isidlale imidlalo eyishumi nantathu ekubeni iBrazilians isadlale imidlalo eyishumi.
