U-Ayew uzozifaka emlandweni wezinkaka kwi-Afcon
Sesizobalwa nezingqalabutho emlandweni we-Africa Cup of Nations (AFCON) isihlabani somdlali waseGhana u-Andre Ayew. U-Ayew usephenduke insika eqenjini lesizwe laseGhana ngenxa yokuzinikela kwakhe.
Lo mdlali ozalwa yinkakha u-Abedi Pele Ayew ukhona eqenjini lama-Black Stars elizoyibamba ku-Afcon ezoqala kusasa e-Ivory Coast. IGhana iboshelwe eqoqweni elilodwa neCape Verde, Egypt neMozambique.
U-Ayew uyibambe endaweni yesibili ohlwini lwabadlali asebedlale inqwaba yemidlalo ye-Afcon. Useyibambe ku-Afcon amahlandla ayisikhombisa ilandelana.
Uqale ukudlala kulo mqhudelwano omkhulukazi webhola e-Afrika ngowezi-2008 ngesikhathi isingethwe yiGhana. Ngemuva kwalokho akabanga esabheka emuva. Udlale e-Angola ngowezi-2010. Uphinde wayibamba eGabon nase-Equatorial Giunea ngo-2012, wabonakala egqoke imibala yama-Black Stars ngowezi-2015 e-Equatorial Guinea nangowezi-2017 eGabon.
Leli nxele yilona ebelihola iGhana ngowezi-2019 kwelaseGibhithe. Naku-Afcon eyedlule eCameroon ubekhona.
Endaweni yesibili u-Ayew ubambene nezingwazi ezifana noHossam Hassan waseGibhithe, Yaya Toure, Didier Zokora, Kolo Toure, Geremi Njitap, Siaka Tienne, Samuel Eto’o, Max Gradel, Asamoah Gyan, Seidou Keita, Youssef Msakni, Rabah Madjer, Salomon Kalou, noMahieddine Meftah.
Kulo nyaka u-Ayew uyohlala endaweni yokuqala lapho ezoyibamba khona nenkakha yaseCameroon, uRigobert Song no-Ahmed Hasan waseGibhithe. Bobabili badlala ku-Afcon amahlandla ayisishiyagalombili.
U-Ayew naye uzodlala i-Afcon okwesishiyagalombili. Kungenzeka ukuthi uzobe edlala okokugcina kulo mqhudelwano. NgoZibandlela ubehlanganisa iminyaka engama-34.
Kuyo yonke le miqhudelwano eyisikhombisa aseyidlalile akakaze anqobe nowodwa. Useke wadlala kowamanqamu kabili kodwa wakhala ngaphansi. IGhana ibheke ukuqeda isomiso seminyaka engama-42 ihlulwa yisicoco se-Afcon.