OMasipala uMkhanyakude nowaseMadlangeni bakhungethwe izinkinga
Simapeketwane isimo kuMasipala waseMkhanyakude nowaseMadlangeni njengoba labo masipala bebhekene nenkinga yokungaphathwa ngendlela nosekuholele ekutheni bafakwe ngaphansi komlawuli.
Ngenyanga edlule izisebenzi kubalwa namakhansela kulabo masipala zihole sekuvalwe amehlo njengoba kade kunenkinga zingakwazi ukuvela ewindini ngenxa yokuthi izikhulu zale Mkhandlu zahluleka ukuphasisa isabelomali kwaze kwadlula isikhathi.
Kuze kube yimanje le mikhandlu ibingakahlali ukuze iphasise isabelomali sayo ngenxa yemibango ekhona yangaphakathi.
Namhlanje ngoLwesibili uMphathiswa weziMali KwaZulu-Nata, uMhlonishwa uNomusa Dube-Ncube nowezokuBusa ngokuBambisana neziNdaba zoMdabu esifundazweni uMhlonishwa uSipho Hlomuka bahlangane nesigungu esilawula uMasipala waseMadlangeni eMgungundlovu kanti ngoLwesihlanu kuhlelwe ukuthi bahlangane nesigungu esilawula uMkhandlu waseMkhanyakude.
Okhulumela uMnyango weziMali KwaZulu-Natal uMnu uNathi Oliphant uthe banethemba lokuthi le mikhandlu izohlala ukuze ikwazi ukuphasisa isabelomali sayo.
“Kunezinkinga zangaphakathi kule Mkhandlu emibili engingeke ngikwazi ukukhuluma ngazo kwabezindaba kodwa ngingakuqinisekisa ukuthi abahlonishwa ababili uNgqongqoshe weziMali uNkk Nomusa Dube-Ncube nowakwaCogta uMnu uSipho Hlomuka bazoba nomhlangano namhlanje emini nezikhulu zikaMasipala waseMkhanyakude ngenhloso yokuxazulula inkinga ekhona,” kusho u-Oliphant.
U-Oliphant uthe uMhlonishwa uDube-Ncube nguyena owagunyaza ukuthi izisebenzi zikaMasipala waseMkhanyakude zihole ngenyanga edlule yize isabelomali besingakaphasiswa.
“UMhlonishwa ukubone kubalulekile ukugunyaza ukuthi izisebenzi zihole ukuze aqinisekise uzinzo kuMasipala waseMkhanyakude kodwa wabe esewufaka ngaphansi komlawuli,” kusho u-Oliphant.
Uthe uMhlonishwa uDube-Ncube uphatheke kabi ukuthi uMasipala waseMadlangeni uthathe isinqumo sokuthi uholele izisebenzi ngenyanga edlule ngaphandle kokugunyazwa nguyena.
Lolu daba luyaqhubeka.