Liyivule ngokunqoba imidlalo yeSA20 elaseThekwini
Ivule iBetway SA20 ngegiya eliphezulu iDurban Super Giant (DSG) ngesikhathi iqumba phansi iMumbia Cape Town ngama-run ali-11 ngohlelo lweDuck-Worth-Lewis Method ngemuva kokuthi umdlalo uphazanyiswe yimvula eHollywoodbets Kingsmead, eThekwini izolo ebusuku.
Leli qembu elizinze eThekwini liwine ithosi laqoka ukushwiba kuqala, Izihambi zibeke ebhodini ama-runs angama-207 kuma-overs angama-20. Kuwe amawikhethi amahlanu ku-Innings yeMumbai.
IDSG ibibhekene nomqansa wokuhubha lesi sibalo sama-runs angama-207 ukuze iphumelele.
URyan Rickelton, uKieron Pollard noLiam Livingston yibona abafake isandla ekudlaleni kahle kweMumbia ku-Innings yokuqala. URickleton ushaye ama-runs angama-87 emabholeni angama-51 kwathi uPollard wazitholela angama-31 emabholeni ali-14.
UKeshav Maharaj, Keemo Paul noDwaine Pretorius bazamile ukubhula umlilo kodwa kwanhlanga zimuka nomoya.
UMaharaj noPaul bathathe iwikhethi eyodwa umdlali ngamunye kwathi uDwaine wahlomula ngamabili.
Ngasohlangothini lweDurban Super Giant bekubhoke uHeinrich Klaasen, Matthew Breetzke noPaul bobathathu abenze isiqiniseko sokuthi leli qembu laseThekwini liqala iSA20 ngegiya eliphezulu.
UKlaassen ugcine eqokwe njengomdlali ovelele kulandela ukumuhluza ama-runs angama-85 emabholeni angama-35.
Ubehamba nayo iMumbia. Kuze kwalamula uKagiso Rabada emkhipha nge-over ye-16 kodwa kwasho ukuthi umonakalo usuwenzekile.
Nge-over ye-17, umdlalo uke waphazanyiswa yimvula okuholele ekutheni umphumela ukhishwe ngohlelo lweDLS.
Uvune iDSG inqobe ngama-run ali-11.
Kusasa ngelesi-5.30 ntambama, iDSG izotholana phezulu nompetha iSunrises Eastern Cape emdlalweni wesibili eSt George’s Oval, eGqeberha.
ISunrises iphazamisekile kowokuqala umdlalo wayo umiswa ngenxa yemvula. Bekumele ivule neJoburg Super King eSt George’s Oval.
