UMokwena ufanise iSundowns nezinkunzi zamaqembu agijima eligini enkulu kwelamaNgisi

Ufanise iqembu lakhe nezinkunzi zamaqembu aphesheya kwezilwandle umqeqeshi weMamelodi Sundowns uRhulani Mokwena.

Ezakhe zidle iPyramids ngo 1-0 wegoli likaTeboho Mokoena emdlalweni weCaf Champions League obuse-28 June Stadium kwelaseGibhithe.

“Siyizincosimende zebhola. Lo mdlalo kanobhutshuzwayo ugijima emithanjeni kithina. Emidlalweni webhola kumqoka ukuqhamuka nezimpendulo umdlalo osuke uzibuza. Uma umdlalo ukuphoqa ukuthi uhlasele sakuzumisa kumele wenze kanjalo. Nakhona uma ukuphoqa ukuthi uhlale emuva ukubhekane nengcindezi kumele wenze njalo kodwa asidlaleli ukwenza njalo. Sibhekana nezimo ngokwesimo somdlalo,” kubeka uMokwena.

Njengamanje Abafana Ba Style sebeqoqe amaphuzu ayisikhombisa ngemuva kwemidlalo emine yamaqoqo.

Sebenqobe imidlalo emibili badliwa kowodwa base badlala ngokulingana kowodwa. Izolo, iBrazilians inqobe ngo 1-0 iguqisa iPyramids.

Ngeledlule la maqembu abambane ngo 0-0 eNingizimu Afrika. Ngaphambi kwalokho ezikaMokwena zazikade zishaywe yiTP Mazembe ngo 1-0 eLubambashi, eDRC Congo.

Kowokuqala wamaqoqo iSundowns ithele othulini iNouadhibou yaseMauritania ngo 3-0.

“Umdlalo sike sawuphutha isikhathi eside okungeyona into elula kuCaf Champions League. Ibhola lesimanje lihamba kanjalo uma ubuka iqembu elihamba phambili emhlabeni iMan City (yenza njalo). Okwenza kubenzima ukudla iCity wukuthi iyinkinga noma ingasaliphethe ibhola. Ne-Arsenal idlala ngendlela efanayo. Yingakho njengamanje izinto ziyihambela kahle kwelamaNgisi,” kuchaza uMokwena.

Kweyamaqoqo iSundowns isisalelwe yimidlalo emibili. Izobhekana neMazembe ePitoli bese ivakashela iNouadhibou eMauritiana.

“Umsebenzi awukapheli. Amaqembu amabili angezansi kwethu sihlukaniswe amaphuzu amathathu nawo. IPyramids nayo akuphelile ngayo. Yingakho umphumela esiwuthola lapha ngingacabangi ukuthi uzohamba ibanga elide ekutheni sizohamba ibanga elingakanani.” kuphetha uMokwena.