Weneme ngefomu kaPhehlukwayo


Uchaza ngokunyusa amasokisi kuka-Andile Phehlukwayo ukaputeni wamaProteas, u-Aiden Markram. UPhehlukwayo ulibamba ngezandla zombili ithuba kumaProteas kulezi zinsuku.
Kuchungechunge lwemidlalo emithathu yosuku olulodwa phakathi kwamaProteas nelaseNdiya, uPhehlukwayo uweze elakuleli ngelibanzi emdlalweni wesibili eSt George’s Oval, eGqeberha.
Ushaye ama-run ayishumi emabholeni amane. Ugcine engakhishwanga kwathi amaProteas anqoba ngamawikhethi amahlanu.
NgeSonto uphinde wasiza amaProteas ekutheni afinyelele esibalweni sama-run ayikhulu ngesikhathi ethelwa ngelaseNdiya ngamawikhethi ayisishiyagalombili.
Ushaye ama-run Angama-33 emabholeni angama-49. AmaProteas akhishwe wonke enama-run ali-116 kuma-over angama-27.3.
Nguyena ogcine eshaye isibalo esikhulu sama-run kubadlali bamaProteas kulo mdlalo. Uphinde wathatha newikhethi eyodwa.
“Akukho okutheni okushintshile ngu-Andy. Into engiyiqaphelile kodwa wukuthi usekhulile njengomdlali. Akasaziboni nje njengomdlali omncane osafuna ukuzakhela igama eqenjini. Njengamanje usezithatha njengomdlali omdala onenselelo yokwenza kahle uma iqembu lisenkundleni. Leyo nselelo wenza kahle ukubhekana nayo,” kubeka uMarkram ngefomu kaPhehlukwayo.
AmaProteas alandela emuva ngo 1-0 kuchungechunge lwemidlalo emithathu yosuku olulodwa.
Aguqile kowamanqamu eDP World Wanderers, eGoli. Owesibili uzodlalwa kusasa eSt George’s Oval bese igoqwa ngoLwesine eBoland, eKapa.
Ngemuva kwalokho la maqembu azobe eseqala imidlalo yama-test. Eyokuqala iseSuperSport Park, eCenturion, ePitoli bese kuthi eyesibili ibanjelwe eNewlands, eKapa uma kuqala unyaka mhla zintathu kuMasingana.
“Uwenza umsebenzi omuhle ngokusithatha asibeke empumelelweni uma ebhetha. Noma eshwiba wenza umsebenzi oncomekayo kakhulu kuma-over aphakathu nomdlalo. Kuyajabulisa ukubona u-Andy esefomini futhi ephakamisa isandla ngokuholela iqembu empumelelweni,” kusho uMarkram.