Udliwe wakhala ngonompempe uKhenyeza obhinjelwa izinto
Iyakhula ingcindezi kumqeqeshi weLamontville Golden Arrows, uMabhuti Khenyeza njengoba ilokhu igqozile imiphumela.
NgoMgqibelo iLamontville Golden Arrows ihlulwe iChippa United eNelson Mandela Bay.
Njengoba ihluliwe bekungwesihlanu kulandelana. Ihlulwe AmaZulu FC kabili koweligi neCarling Black Label Knockout, iRoyal AM, iCape Town City neChippa United.
Kuyimanje ihlezi endaweni yesikhombisa kulogi ngamaphuzu angama-20 emva kwemidlalo eli-13.
Ukuhlulwa kwayo iLamontville Golden Arrows uKhenyeza, umunwe uwukhombe kunompempe obedlalisa uThando Ndzanzeka.
“UNdzanzeka ube nomthethela ekutheni sihlulwe, bekumele asibekele iphenathi kodwa wangakwenza lokho. Ube esebeka ifree-kick engekho nokuyiyo enikeze iChippa United igoli. Nangesizini edlule wenza esifanayo sidlala neMaritzburg United, esikhundleni sokusinika iphenathi wathi akube ifree-kick” kusho uKhenyeza.
Lo mqeqeshi akakufihlanga ukuthi ukudlala ngabadlali abangenaso isipiliyoni nakho kudlale indima ekutheni behlulwe, kodwa akuyona indlela leyo yokuzivikela.
“Siyiqale kahle isizini ngabadlali bethu abancane kodwa manje ingcindezi iyavela ukuthi lesi sigaba siyawadinga amava” usho kanje.
Umdlali obeqala ukubonakala ngoMgqibelo uThabani Zuke ongukaputeni, obesekuphele izinyanga ezili-11 agcina ukudlala ngenhla yokulimala. Lesi sitobha salimala mhla zingama-31 kuMasingana nonyaka, eMoses Mabhida Stadium.
Kumdlalo olandelayo i-Arrows izotholana phezulu ne-Orlando Pirates ngeSonto eMpumalanga Stadium, eHammarsdale.
Omunye umqeqeshi onenkulu ingcindezi uKaitano Tembo oqeqesha iRichards Bay FC ebhinjelwa izinto, nayizolo igude ngamagoli amathathu kwamabili komkhaya bayo iRoyal AM.
IBay kuyimanje ihlezi endaweni yesibili uma kusukwa emsileni kulogi.
