UBebe Winans nolozolo eThekwinini kulempelasonto
Abathandi bomculo opholile we-RnB nowokholo bazobe bekhomba ngophakathi kusasa njengoba isihlabani somculi waphesheya uBenjami “Bebe” Winans ezobe enekhonsathi kulelidolobha, eMoses Mabhida Stadium..
Lekhonsathi ebizwa nge: It All Comes Down To Love – South Africa Tour izoba semadolobheni amathathu amakhulu alapha eNingizimu Afrika. Izoqala lapha ‘eMdubane’ kusasa ziyi-9 kwephezulu, bese kulandela iKapa mhla ziyi-15 eGrand Arena kugcine iGoli mhla ziyi-16 kuyo le ephezulu eSunbet Arena.
UWinans oneminyaka engama-61 wazise abalandeli bakhe baseNingizimu Afrika ngalekhonsathi maphakathi nonyaka kanti amathikithi abethengwa ubuthaphuthaphu nokungamangazanga uma abakwaTicketPro bememezela ukuthi asethengiswe wonke eSunbet Arena kanti kwamaye amadolobha aseyingcosana asele.
Abenkampani iRemoakantse Holdings nokuyibo abahleli balekhonsathi bathi kubaphoqile ukuthi baphinde bengeze olunye usuku eGoli ngenxa yedumela. Okusho ukuthi abalandeli abangakwazanga ukuthola amathikithi aseSunbet Arena bazokwazi ukuthokozela enye ikhonsathi ngomhla zingama-17 kuZibandlela e-Emperors Palace eKempton Park.
Ngokusho kukaThabiso Mogashwa okhangisa ngalekhonsathi uthe lolu uhambo lokugcina lukaBebe Winans eza lapha eNingizimu Afrika ukuzocula, nokuyikho okwenza abalandeli bakhe bafune ukuba yingxenye yalengqophamlando. “UBebe ujabule kakhulu ngokuza kwakhe lapha eMzansi. Lokhu kusenza sibone ukuthi senze isinqumo esifanele ngokuhlela lekhonsathi futhi singakusho kugcwale umlomo ukuthi abalandeli bakhe bazobhema bakholwe,” kuphawula uMogashwa.
Amanoni aziwa ngawo kakhulu uWinans nokulindeleke ukuthi angasali ahlanganisa i-I Found Love, Coming Back Home, Up Where We Belong, It All Comes Down To All namanye amaningi.
Lekhonsathi yakusasa kulindeleke ukuthi ihanjelwe osaziwayo balapha eNingizimu Afrika abaningi nabo abangakwazanga ukuthenga amathikithi aseGoli kusasenesikhathi.
