Konke sekumi ngomumo kwiBanyana
Ziphile saka zonke izithenjwa zabadlali beBanyana Banyana ezoshukana neBurkina Faso kusasa ngelesi-6 ebusuku eStade Charles Konan Banny Yammoussouk emdlalweni wokuhlungela ukuzibekisela indawo kuWomen’s Africa Cup of Nations (Wafcon).
IBanyana iyona engompetha be-Wafcon. Ngonyaka odlule ithela othulini osokhaya iMorocco kowamanqamu.
Nangonyaka ozayo, iWafcon izophinde ibanjelwe kwelaseMorocco. Umqeqeshi weBanyana uDesiree Ellis ukubeke kwacaca ukuthi akekho umdlali othintekile ngaphambi kwalo mdlalo womlenze wokuqala.
“Bonke abadlali bebeyingxenye yesikwati ebesizilolonga ngaphambi kokuthi sibhekise amabombo e-Ivory Coast. Abadlali abagijima phesheya kwezilwandle bafike izolo ebusuku (esho ngoMsombuluko). Sibanike usuku lokuphumula ngoba bahambe ibanga elide bezosijoyina kanti bebedlala emaqenjini abo ngempelasonto. Kumqoka ukuthi siyinakekele imizimba nemilenze yabadlali ngoba iningi labo badlale inqwaba yemizuzu engamashumi ayisishiyagalolunye kulamaviki amathathu adlule,” kubeka u-Ellis.
Umlenze wesibili uzodlalelwa eLucas Moripe Stadium, ePitoli ngoMsombuluko ngelesi-3 ntambama.
“Sizokwenza konke okusemandleni ukugcina abadlali bethu bewumqemane. Namuhla (ngoLwesibili) konke kuhambe kahle. Besigxile kakhulu ezintweni ezithinta ibhola. Sibe sesigxila kwezithinta amaqhinga ngasekupheleni kohlelo lwethu lokuziqeqesha. Sinezinsuku ezimbili kuphela zokwenza konke esifuna ukukuhlela ngaphambi komdlalo. Ekuseni besihlaziya indlela izitha ezihleleka ngayo noma uhlelo lazo lokudlala. Liyashisa lapha. Lishisela ngaphakathi kodwa uyalizwa. Siphuza kakhulu amanzi nezinye izakhamzimba ukulwa nesimo sezulu,” kuqhuba yena.
UJanine Van Wyk kubhekwe ukuthi athole ithuba kuyona yombili imidlalo. Usedlale imidlalo eyi-183. Udinga imidlalo emibili ukuze abe ngumdlali onemidlalo eminingi kunabo bonke abadlali e-Afrika emaqenjini esizwe.
“Iqembu lami lilambile. Uyalibona ukuthi liphokophele ukwenza kahle. Uma udlala e-Afrika ubhekana nezingqinamba ezahlukene. Iningi labadlali bethu linesipiliyoni esanele ukuqonda lokho. Lizosheshe lilithole uzinzo. Ngeneme ngesimo senkundla. Uhlelo lwethu lokuzilolonga luhambe kahle kakhulu. Ngaphambi kokuthi sihambe besazi ukuthi sizobhekana naziphi izingqinamba ohambweni lwethu. Yingakho siqale ngokuzilolonga ekhaya ngaphambi kokuthi sihambe. Besazi sizofika lapha sikhathele. Kusanezinto ezincane esisafuna ukuzilungisa kodwa sizokwenza isiqiniseko sokuthi asichithi isikhathi esiningi ejimini.” kusonga u-Ellis.
