Now Reading
Imisebenzi kaZungu oSuthwini ibonwa nayingane encane
Dark Light

Imisebenzi kaZungu oSuthwini ibonwa nayingane encane

Izindaba ezingene ngeSonto ntambama zokudlula kukaBongi “Mdeva” Ntuli obengumgadli waMaZulu FC zihlabe zephekela. Lo mgadli ubengayibheki inethi. Udlula emhlabeni nje Usuthu lubheke kowandulela owamanqamu eBlack Label Knockout. Inhloso yalolu neku akukhona ukukhuluma ngoNtuli waseMkhambathini, kodwa bengeke ngingalisiki elijikayo kwazise ungomunye wabadlali abazakhele igama kuleli. Hamba kahle Sompisi, umndeni wakho  neqembu AmaZulu FC engathi bangathobeka amanxeba kulesi sikhathi.

Ngithi ake ngincome umphathi walo leli qembu uSandile Zungu ofike noguquko olukhulu kuleli qembu elibalwa namadala kuPremier Soccer League (PSL), kwazise eminyakeni ezayo lizobe lihlanganisa ikhulu lasungulwa. UZungu ufike  wangasaba ukungena emakethe wathenga abadlali beqophelo, buka nje ngesizini edlule lize lafinyelela kowamanqamu eMTN 8. 

Leli qembu selibuya ngisho ukuyodlala e-Afrika, kwazise ngesizini yokuqala uZungu engusihlalo laqeda endaweni yesibili kuligi okuyinto lelo eyaba nkulu kakhulu.  Ngeledlule Usuthu luguqise iLamontville Golden Arrows kowamaQuarter-Final eBlack Label Knockout. Lubheke kowandulela owamanqamu walo mqhudelwano oqalwayo ukudlalwa kule sizini. 

Kowandulela owamanqamu Usuthu luzobhekana neTS Galaxy, kuthi iRichards Bay FC itholane neStellenbosch FC. 

UZungu uphinde weza nomkhulu umehluko wokuthi leli qembu likwazi ukumaketheka, ngendlela eseqopheleni eliphezulu. EMoses Mabhida Stadium kunesitolo esidayisa izimpahla zaleli qembu.  Ezikhathini eziningi uZungu uyafika ejimini ezobheka iqembu lakhe, okuyinto engajwayelekile kwizikhulu eziningi. 

See Also

Lesi sifiso anaso sokuthi leli qembu lifike emiyakeni elikhulu sekukhona izicoco elizinqobile, ngibona sizofezeka ngoba abadlali baneme kanti futhi ungena kahle emakethe.

Omunye wabadlali waleli qembu engisondele naye akawuvali umlomo, uncoma uZungu ngokuthi umuntu owuqondayo unobhutshuzwayo futhi ubaseka ngakho konke. Uma abadlali bejabule eqenjini benza kahle, ngoba abanaso isizathu sokubhacaza. 

Scroll To Top