Isihlangu soSuthu siwile: Namanje kabakholwa ukuthi “uMdeva” kasekho
Umgadli weRichards Bay FC uSomila “Ballo” Ntsundwana, uthe kusenzima ukukholwa ukuthi akasekho ngempela emhlabeni uBongi “Mdeva” Ntuli obengumgadli waMaZulu FC.
UNtuli udlule emhlabeni ngeSonto, AmaZulu FC akhipha isitatimende ntambama nesasiveza ukuthi okumenele kwaba ukuthi unomdlavuza (ongachazwanga) obese usabalale nakwezinye izingxenye zomzimba.
Usuku ahambe ngalo uNtuli bekumele lube olwenjabulo kuyena kwazise bekuzobe kuhlangene umndeni wakwaNtuli (kwabo) nabakwaZungu.
UMalokazane uSinenjabulo Zungu (Oyindodakazi kaSandile Zungu ongumnikazi waMaZulu FC), ubezobe elethe umabo kubo kaNtuli.
UNtsundwana uthe ngesikhathi ezwa lezi izindaba kuvele kwanzima ukuthi azikholwe.
“Ngifika esifundazweni iKwaZulu-Natal ngowezi-2017 ngangumfana omncane ongazi lutho ozozizamela impilo. Ngangingazimuntu uBongi akangixwayanga nhlobo, wangithatha wangenza umngani owagcina esephenduka ubhuti. Kwenzeka lokho naye ubolekisiwe kuMaZulu FC ubolekiswe iMamelodi Sundowns. Wangifundisa izinto eziningi. Okuxakayo ukuthi sabe sidlala indawo efanayo, kodwa kumina akabonanga isitha. Kusenzima ngempela ukwamukela ukuthi akasekho” kusho uNtsundwana.
Namuhla ngoLwesithathu kuzoba nesikhumbuzo sakhe uNtuli, nesizoqala ngehora lesithathu ntambama eMoses Mabhida Stadium.
“NgoLwesine ngithole ucingo obeluqhamuka kuyena uNtuli, ngafika eseluvalile ngagcine ngingabuyelanga kuyena lokho kusho ukuthi besokhuluma naye okokugcina. Kungiphathe kabuhlungu lokho sengizwa izindaba zokuthi akasekho ngeSonto. Sazane iminyaka emincane naye kodwa, ungiphilelile kakhulu. Bekuthi makungahambi kahle, kumina nasemndenini wami kube uyena engikhalela kuyena” kubeka uNtsundwana.
Lo mgadli odabuka ePort Elizabeth uthe wayehlezi esho ukuthi uthanda uhlobo lwemoto iMustang, uNtuli wathi uma eyithenga leyomoto wamnika ukuthi ayishayele.
“Ngenhlanhla asijimi, ngalokho nakanjani ngeke ngingamfihli umfowethu. Kodwa namanje ngisasho ukuthi kusenzima ukukholwa lento” kusho uNtsundwana.
Lo mgadli kubukeka kuvuleke isilonda ebesisaphola njengoba ngoNdasa nonyaka kwahamba emhlabeni ukaputeni weRichards Bay FC uSphamandla Mtolo.
UMtolo ukudlula kwakhe emhlabeni kwashiya ungabazane olufanayo nolukaNtuli.