Zizoguga iphakethe iziMpofana ngenxa yokungaziphathi kahle kwabalandeli bazo

Amakhosi azobhekana neCape Town Spurs eFNB Stadium namhlanje , eSoweto, eGoli ngaphandle kwezibukeli.

Leli qembu lihlawuliswe umdlalo owodwa lidlala ngaphandle kwezibukeli. Intatheli yelaboHlanga isibhekela izizathu ezizoholela ekutheni iChiefs ishayeke epheketheni kulo mdlalo.

Umsuka ngesigwebo seChiefs:

• Kaizer Chiefs v TS Galaxy FC:

Ekuqaleni kwesizini umqeqeshi waMakhosi uMolefi Ntseki uphume ngesamagundane eMbombela Stadium. Izimpofana ziguqiswe yiTS Galaxy ngegoli eli-1 eqandeni. Ahlawuliswe isamba sezi-R100 000. Ikomidi eliqondisa izigwegwe kuPremier Soccer League liyalele ukuthi iqembu likhokhe izi-R70 000 kwase kuthi ingxenye eyizi-R30 000 ilengiswe ngombandela wokuthi lingatholakali necala elifanayo.

• Kaizer Chiefs v SuperSport United:

Abalandeli beChiefs baphinde bavuka umbejazane bequnjwa phansi Amatsatsantsa asePitori ngo 1-0. Bebefuna ukumudla luhlaza uNtseki ophume esegadwe amaphoyisa. Ikomidi eliqondisa izigwegwe liphinde lathola Amakhosi esecaleni. Ahlawuliswe izi-R200 000 kwathi izi-R50 000 walengiswa. Izi-R30 000 owawulengisiwe ecaleni uphinde wavuka. Isiyonke imali ekhokhwe yiChiefs kube yizi-R180 000 yase ibekelwa umbandela wokuthi ingatholakali necala elifanayo zingakapheli izinyanga eziyisithupha. 

• Kaizer Chiefs v AmaZulu:

Abalandeli beChiefs bakuphindile lokho bedliwa AmaZulu kuCarling Black Label Knockout eFNB Stadium. Bajikijele umqeqeshi uNtseki. Kube sekuvuka izi-R50 000 owalengiswa ngesikhathi ehlawuliswa kulandela ukuhluleka wukuziphatha kwabalandeli ibhekene neSuperSport. Leli qembu lihlawuliswe izi-R300 000 olengiswe wonke ngombandela wokuthi lingatholakali necala elifanayo zingakapheli izinyanga eziyisithupha.

Nazi izindlela iChiefs ezoshayeka ngazo:

1. Ngeke ikwazi ukudayisa amathikithi:

• Amathikithi kawonke wonke:

Njengamanje alikho iqembu elidayisa amathikithi njengeChiefs kungakhathalele ukuthi idlala kuphi. Cishe leli qembu lidayisa amathikithi angaphezu kwezi-7 000 umdlalo nomdlalo. Ngokwenjwayelo amathikithi omdlalo weChiefs uma ingadlali ne-Orlando Pirates noma iMamelodi Sundowns abiza ama-R60.

7000 (wamathikithi) x R60 

= R420 000 

• Amathikithi ezicukuthwane:

– IChiefs iphinde idayise amathikithi ezicukuthwane. Ngokujwayelekile ibhokisi libiza izi-R15 000 kuyaphezulu. Uma kuvulwe amabhokisi ayishumi ngomdlalo, iqembu lenza ngaphezu kwezi-R100 000.

10 × R15 000 

= R150 000 

2. Abadayisi:

Bazoshayeka kakhulu omama nobaba abadayisa ukudla, amakinati, iziphuzo namanzi amponjwana. Isoseshi elihamba nesinkwa lijwayele ukubiza ama-R30. Kula bantu abayizi-7 000 uma kuthenge abayizi-3000 inkundla yenza enhle inzuzo.

• Ukudla:

3 000 x R30 

= R90 000 

• Iziphuzo:

Ngokujwayelekile ubhiya udayiswa ngama-R25 igilazi bese kuthi isiphuzo esingenawo amponjwana sibiza ama-R20. 

• Amanzi nezinye iziphuzo:

500 x R20 

= R10 000 

• Utshwala:

1 000 × 25 × 3 

= R75 000 

Ngokokudayisa kukodwa inkundla yenza imali ebheke kwizi-R200 000.

3. Izindawo zokupaka:

AbakwaToyota okungabaxhasi beChiefs banombandela wokuthi uma ushayela imoto yakwaToyota upaka mahhala. Kungenjalo kumele uzitholele indawo yakho yokupaka. Izindawo zokupaka zibiza ama-R30 kuya phezulu.

500( inani lezimoto ezizopaka) x R30 

= R10 000 

4. Amagaraji nama-tollgate azolimala:

Iningi lezimoto ezisuke zihambise abantu ukuzothamela imidlalo ziyaye zidlule emagaraji zifake uphethiloli. Uma usuka ePitoli, KwaThema, Duduza, Tsakane, KwaNdebele naseGermiston noma kwezinye izifundazwe usuke uzokhokhela ama-tollgate uphinde ufake nophethiloli. Abalandeli baphinde bathenge kula magalaji.

5. Izinkampani zokupheka:

Ngeke zisebenze ezinye izinkampani zokupheka ngoba amabhokisi amaningi azobe evaliwe. Kuzobe kuvulwe eleChiefs, elezivakashi nelezintatheli. 

6. Izinkampani zonogada:

Isibalo sonogada abazoqashwa ukuzosebenza kulo mdlalo sizokwehla ngoba abekho abalandeli. Lokhu kuzoyithikameza nenkampani egadayo ngoba nemali yayo yokugada inkundla izokwehla.