Akavumanga ukukhubazeka kwakhe kuphazamise iphupho lakhe
UKGOTHATSO Montjane uzalwe nokukhubazeka ezandleni nasezinyaweni okwaholela ekutheni anqanyulwe izinyawo eneminyaka eyishumi nambili agxunyekwe ezokufakelwa.
Le ntokazi edabuka eSeshego, eLimpopo ayizange ivumele isimo sayo siyiphazamise ekutheni ifeze amaphupho ayo.
Njengamanje uMontjane ubalwa nabadlali bebhola lomphebezo abahamba phambili emhlabeni. Ngowe-2018, ube ngowesifazane wokuqala omnyama ukubamba iqhaza emqhudelwaneni ozaziwa ngeWimbledon.
Kulo nyaka uqophe umlando lapho eba ngumdlali wethenisi wokuqala omnyama ukunqoba i-Grand Slam ngesikhathi edla iRoland Garros ebambisene noYui Kamijin.
Useke wafinyelela amahlandla amabili kowamanqamu weWimbledon kanti usephume izikhathi eziyisishiyagalombili kowandulela amanqamu e-Australian Open. UMontjane uphethe izicoco ezingu-29. UZipho Singela(ZS) uxoxe nale ntokozi ingxoxo yabo yahamba kanje.
ZPHO SINGELA (ZS): Uzizwa kanjani ngokufeza iphupho lakho lokunqoba iGrand Slam yakho yokuqala ngemuva kweminyaka uzabalaza?
Kgothatso Montjane (KM): Ngijabule ngendlela eyisimanga ngokwesekwa engikuthola kubaxhasi neqembu lami. Konke kufezeke ngenxa yabo. Ngiyaziqhenya ngokuthi angizange ngidikibale noma ngiphose ithawula. Lezi yizikhathi ezimnandi nezijabulisayo kimina.
ZS: Iphupho lakho liqale nini?
KM: Ngiqale ukudlala ibhola lomphebezo njengendlela yokuchitha isikhathi. Ukugqugquzeleka engikuthole emphakathini yikona okungenze ngafaka umfutho nogqozi kulo mdlalo. Ngibona wonke umuntu ubambe iqhaza empumelelweni yami. Kuyacaca ukuthi babone ikhono kimina. Okwami bekuwukukholwa wukuthi iphupho lami ngingalenza lifezeke. Kulapho ngiqale ngasebenza kanzima ukujaha leli phupho.
ZS: Ngesikhathi uqale wake wazibona uhamba ibanga elide kangaka?
KM: Ukukhuluma iqiniso ngaqala ngizidlalela ukuchitha isikhathi. Ngangingakaze ngizibone noma ngiziphuphe nginqoba i-grand slam. Ngiqale ukuphupha ngokunqoba i-grand slam sengidlala ezingeni elikhokhelayo.
ZS: Yiziphi izingqinamba obhekane nazo indleleni ebheke empumelelweni?
KM: Ukuthola iqembu elihlelekile nokwesekwa ngosizo lwezimali bekuyizona zinkinga ezinkulu engihlangabezane nazo ngesikhathi ngisaqala kodwa njengamanje angeke ngikhale. Ngijabule kakhulu ngezinto ezinhle ezizayo.
ZS: Ubhekane kanjani nalezi zinkinga futhi ngubani okugqugquzelile?
KM: Angizange ngizifakele ingcindezi. Ngibhekane nosuku nosuku ngase ngilokhu ngiguqa phansi ngedolo ngithandaza ukuthi isimo sami siguquke. Ngenhlanhla-ke ukudlala ibhola lomphebezo kungenza ngihlanye. Ukuba yingxenye yalo mdlalo kungakha umqondo wokungalilahli ithemba.
ZS: Ungumdlali wokuqala omnyama ukunqoba i-grand slam. Uzizwa unjani ngalokho?
KM: Kuhlale kuyintokozo ukuba yingxenye yomlando. Ngethemba ukuthi kuzofaka ugqozi entsheni yamanje ukuthi ayikho into engenzeki empilweni, amaphupho ayafezeka.
ZS: Njengoba usuyitholile i-Grand Slam. Yikuphi okunye obheke ukukuzuza?
KM: Ngisafuna ukunqoba i-Grand Slam ngihamba ngedwa.
ZS: Ukhiye wakho wempumelelo kuRoland Garros kube yini?
KM: Ukuxhumana kahle noYui nokuthi sigxile kulo lonke iphuzu emdlalweni.
ZS: Siyabonga ngesikhathi sakho.
KM: Wamukelekile.