Konke sekumi ngomumo ngemidlalo ye-ABC Motsepe
Iyasuka iyahlala imidlalo ye-ABC Motsepe League esifundazweni iKwaZulu-Natal kule mpelasonto. Kulindeleke ukuthi imidlalo iqale ngegiya eliphezulu, kwazise amaqembu amaningi ake abhekana kumqhudelwano weKZN Primo Cup nowagcina unqotshwa iNjampela FC.
Amaqembu aphinde abhekana emdlaweni yokuhlungela ukungenela iNedbank Cup Last 32. Iqembu elagcina liwaqwaqwade wonke emakhanda uMkhambathi FC waseMkhambathini Ngesikhathi isavaliwe leligi, amaqembu apheke athulula kakhulukazi kubaqeqeshi.
UMvoti FC uzoqeqeshwa u-Ayanda “Cobra” Dlamini. Lo mqeqeshi ubeqeqesha AmaZulu FC, uzobe elekelelwa uPhelelani Mpangase noLindokuhle Bhengu.
UMafa”Wele” Zuma obeqeqesha iSummerfield Dynamos ushiye kuleli qembu wavumbuka kwiNewcastle All Stars.
Ukuhamba kukaZuma kuvulele ithuba uClaude Tarin obeyisekela, uzobe elekelelwa uThabani “Fish” Zondo. UMondli Ntinga uzoqhuba umkhumbi woMkhambathi FC, emva kokuthatha izintambo kuSiyabonga Mdluli. UMkhumbane Classic ubuyise uCyril Mthembu, emva kokuthi leli qembu lihlukane noDoctor Mkhonza obethwelwe ngeqoma ukuthi angayisa leli qembu kumaplay-offs njengoba enzile kuMsinga United ngesizini edlule. UMkhonza uphikwe imiphumela kwimiqhudelwano okubalwa iKZN Primo Cup neyokuhlungela ukungenela iNedbank Cup Last 32. Kuyona yomubili lemiqhudelwano waphuma ekuseni.
INjampela FC ihlukane nabaqeqeshi bayo uThulisani “Gattuso” Latha nesekela lakhe lakhe uPhakamani “Casillas” Nxumalo. Leli qembu seliqeqeshwa uTsepo Motsoenang, uLatha noNxumalo sebeqeqesha iMidlands Wanderers FC. Iligi izoqhubeka nokuthi idlalwe ngamaqoqo amabili, iqoqo ngalinye lizoba namaqembu ali-10. Kuzophinde kube nomdlalo lapho kubangwa indawo yokudlala kule ligi.
Umdlalo uzoba phakathi kweDurban Pioneer ne-Asande ozohlulwa uzodliwa izembe.
Akhona amaqembu angomakoti okukhona iDlangezwe Hellenic FC, i-Oyzn Academy, iTitanic, iChess neSwayimane FC. Imidlalo yakule mpelasonto ihlelwe kanje:
Iqoqo A
Muzi King Masters neDlangezwa Hellenic Ngcedomhlophe
Stone Breakers neNjampela FC Msani Stadium
Mkhumbane Classic FC ne-Oyzn Academy eSJ Smith
Asanda neMidlands Wanderers FC (enkundleni esazomenyezelwa)
Iqoqo B
Remax Address Friends neTitanic e-UKZN Edgewood
Newcastle All Stars neSwayimane FC e-Arbor Park
Chess FC neMkhambathi FC Osizweni Stadium
Umvoti FC ne-Ethekwini Coastal eKing Edward
Umsinga United neDrakensburg eMzisho Stadium
*Yonke le midlalo izoqala ngehora lesithathu ntambama
