Insada yemali ezotholwa kuCarling
Izoba ningi imali ezonqotshwa iqembu elizodla umhlanganiso kumqhudelwano omusha iCarling Black Label Knockout. Lo mqhudelwano uthulwe ngokusemthethweni ngoLwesibili eGoli. Okwenze kugqame ukuthi iqembu elizowunqoba lo mqhudelwano lizogoduka nemali eningi, ingoba umdlali ozobe edlale kahle emdlaweni ngokuvotelwa abalandeli uzogoduka nezinkulungwane ezili-R100.
Umdlali osuke enze kahle kwi-MTN 8 okungumqhudelwano womkhumulajezi obalwa njengonemali eningi, ugoduka nezinkulungwane eziyi-R8. Iqembu elinqobe iMTN 8 lihamba nezigidi eziyi-R8. Umdlali osuke eqokwe njengowosuku emdlalweni weDStv Premiership yena ugoduka nezinkulungwane ezinhlanu.
Inani lemali ezotholwa iqembu elinqobile izomenyezelwa ngosuku lapho okuzoshiwo izinsuku ozodlala ngawo lo mqhudelwano, odlalwa amaqembu ali-16 adlala kwiDStv Premiership. Kuphinde kwagqama ukuthi abalandeli bazodlala enkulu indima kulo mqhudelwano. Ngaphandle kokuvotela umdlali ovelele, bazophinde baqagele ukuthi iqembu labo lizolishaya nini igoli nakho lokho kuhambisana nemali.
Ngaphezu kweKnockout, kusazoqhubeka neCarling Black Label Cup. Kulokhu, iqembu elinqobe iCarling Black Label Knockout lizodlala neqembu elizokwakhiwa abalandeli. Umqeqeshi weqembu le-All Stars uzophinde avotelwe ibona abalandeli. Lo mdlalo wona uyoba mhla ziyisithupha kuMasingana wezi-2024, ePeter Mokaba Stadium, ePolokwane.
Umdlalo wamanqamu uyobe udlale mhla zili-16 kuZibandlela, abantu abaningi bakhomba iMoses Mabhida Stadium njengenkundla ezosingatha lo mdlalo.
Imidlalo iqhathwe kanje:
Sekhukhune United v Royal AM; Orlando Pirates v Cape Town Spurs; SuperSport United v Polokwane City; TS Galaxy v Mamelodi Sundowns; Chippa United v Stellenbosch FC; Richards Bay FC v Moroka Swallows; Kaizer Chiefs v AmaZulu FC; Golden Arrows v Cape Town City.