UHlongwa ufike wabuyisa ithemba kuMilford engenamqeqeshi
Akafuni ukuxhamazela ngesikhundla somqeqeshi usihlalo weMilford uXanti Pupuma. Ekuqaleni kwesizini uPupuma ushaye iphakethe wathenga isitifiketi soThongathi ngezigidi. Ezakhe beziyibamba ku-ABC Motsepe League. Ngesizini edlule zidle ubhedu eqoqweni lazo kodwa zakhala ngaphansi kowamanqamu obuzokhipha umpetha esifundazweni bekhishwe uMsinga.
UDokotela uPupuma uthathe isinqumo sokuthenga isitifiketi soThongathi FC kulandela ukuhluleka wukuzibekisela indawo kweyokuhlungela kuMotsepe Foundation Championship. EzikaPupuma aziqalanga kahle emidlalweni yeligi ziqunjwe phansi imidlalo emine ilandelana okuholele ekutheni ibhantshi ligcwale umoya ku-Asanda Mvalo obepheka iqembu. Ushaywe yiMaritzburg United, i-Orbit College engomakoti, University of Pretoria (Tuks) neMarumo Gallants.
UNhlanhla Hlongwa nguyena osabambe izintambo kuze kutholakale umqeqeshi omusha. “Umqeqeshi siyambheka inkinga esisuke sabhekana nayo wukuthi imidlalo isuke yasondelana eduze. Ngaleyo ndlela asizange sibe nesikhathi esanele sokwenza uhlelo lokuthola umqeqeshi omusha. Sizoqhubeka noHlongwa nangempelasonto bese kuthi ngekhefu leFifa sithathe isinqumo ngomqeqeshi. Naye kuzomnika ithuba lokuzinza,” kusho uPupuma.
UHlongwa usefike wabuyisa ithemba kumaStallions. Ubambane nePretoria Callies ekuhambeni ngo 0-0 ngemuva kwalokho wadlala ngokulingana neMagesi FC ngo 1-1 ePrincess Magogo Stadium maphakathi nesonto.
IMilford FC ihlezi ekugcineni ku-logi ngamaphuzu amabili ngemuva kwemidlalo eyisithupha.
“Ngeke ngilijabulele ithuba lokuthatha izintambo zokuqeqesha ngokugcwele. Angifuni nje ukuqamba amanga. Lona akuwona umsebenzi olula. Uma uyindoda kumele ubeneqiniso, ungaziqambeli amanga. Khumbula usihlalo ukhiphe imali eshisiwe ethenga iqembu. Ngeke ngithathe amashansi. Sidinga umqeqeshi (onesipiliyoni) ozohola iqembu. Angikwazi ukugembula ngemali kasihlalo” kusho uHlongwa.
Kusasa ngele-3.30 ntambama, iMilford FC izovakashela iCasric Stars KwaMhlanga Stadium, KwaNdebele, eMpumalanga. “Angizibukeli phansi kodwa angikakulungeli ukuba ngumqeqeshi ngokugcwele kulesi sigaba. Yebo, kumasizini azayo singakhuluma. Mhlawumbe ngobe sengisilungele lesi sigaba.. Akumele ngiqambele iqembu amanga. Okwamanje ngeke ngikwazi,” kuphetha uHlongwa.