Ufuna ukubhincisela nxanye uTshisekedi kwesikaMengameli

Umholi weqembu eliphikisayo eDemocratic Republic of Congo uMartin Fayulu ukuqinisekisile ukuthi uzofaka isicelo sakhe sokungenela ukhetho lobuMengameli lwangoZibandlela, lapho kulindeleke ukuthi abe ngomunye wabaphikisana kakhulu noMengameli uFelix Tshisekedi.
U-Fayulu owake waba yisikhulu se-Exxon Mobil, uneminyaka engama-66, uphume isibili kuTshisekedi okhethweni olube nombango lwangowezi-2018. Iqembu lakhe, i-Engagement for Citizenship and Development Party, i-African Union kanye neBandla lamaKhatholika bangabaza umphumela wokhetho kwathi uFayulu waphikisa imiphumela enkantolo.

Kusukela lapho usalokhu egxeka kakhulu isikhundla sikaMengameli uTshisekedi, esabisa ngokuduba ukhetho likaZibandlela ebhikisha ngezinsolo zokukhwabanisa okuhlobene nohlu lwabavoti – isinqumo manje athi besiyodlala ezandleni zabamelene naye.
“Abaningi bancamela ukuthi ngingabi ingxenye yokhetho, okuzobasiza,” etshela isithangami sabezindaba enhlokodolobha iKinshasa, ethi uzobhalisa ngokusemthethweni ukhetho lwakhe kwikhomishini yokhetho zi-4 kuMfumfu.

Emzamweni wokuvumela ukubhekisiswa okwengeziwe, iqembu lakhe lifuna imiphumela yokhetho imenyezelwe esikhungweni sokuvota ngokungafani nokhetho langowezi-2018, amavoti angaphambi kokhetho ayebikezele ukuthi uFayulu uzowina ngamalengiso.