Kukhona okusina kujeqeza uNtseki njengoba kulandwe uJohnson eNaturena
Sekungaba ukunqoba kuphela okungenza asinde ezembeni
Uphendlelwa isikhundla sokucija iKaizer Chiefs, uCavin Johnson osanda kuqashwa Amakhosi.
UJohnson ozakhele igama emaqenjini afana noPlatinum Stars, SuperSport United naMaZulu FC umenyezelwe iChiefs njengenhloko yamaqembu ezinkulisa ekupheleni kwesonto eledlule.
Lolu qweqwe lomqeqeshi luke lasebenza noPitso “Jingles” Mosimane njengephini lakhe ku-Al Ahly yaseGibhithe ngaphambi kokukhuza ibuya eNingizimu Afrika.
Umthombo welaboHlanga ozazi zonke ezithinta iChiefs uthe uJohnson angase athathe izintambo kuMolefi Ntseki uma iqembu liqhubeka ukuphikwa yimiphumela.
“UJohnson ngathi izikhulu zeChiefs zifuna azothatha izintambo zokucija iqembu. Zikhathazekile ngokugqoza kwemiphumela. Yingakho kuthathwe isinqumo sokuthi zisondeze uJohnson uzohlaziya nemidlalo yeqembu. Okwenza izikhulu zikhathazeke kakhulu wulaka lwabalandeli. Ziyabona ukuthi iqembu lizofa wukukhokha. Phela uZola Majavu akadlali. Lokhu kuze kwaphoqa ukuthi abaphathi beqembu bathumele uJessica Motaung esithangamini nabezindaba ngaphambi komdlalo neMamelodi Sundowns. Bebefuna azobhula umlilo kubalandeli,” kuchaza umthombo.
Emasontweni adlule ihhovisi likaKaizer Motaung Junior lithole inqwaba yezicelo zabaqeqeshi bangaphandle abaseqophelweni eliphezulu abebekhombisa intshisekelo yokuhalela ukuthatha lo msebenzi.
Phakathi kwabaqeqeshi abagaqele lesi sikhundla bekukhona igama likaMilutin “Micho” Sredjovic waseSerbia, Mario Marinica waseRomania, Ruud Krol waseHolland noDan Malesela ongowokuzalwa kuleli.
Igama likaMicho like lasikazwa kodwa kwagcina kungaphunywanga nesinqumo esiwujuqu.
“UJohnson bambuzile ukuthi angasithatha yini isikhundla sokucija iqembu elikhulu. Uziphendulele wathi yebo, angasithatha kodwa uzodinga ukuhlanganisa ithimba labaqeqeshi ngoba akazimisele ukusebenza no-Arthur Zwane uma enikwa lo msebenzi. Izikhulu zizobheka imiphumela ukuthi ihamba kanjani. Uma iqembu lingayitholi imiphumela ungathuki uma uJohnson ethulwa njengomqeqeshi eqenjini elikhulu. Imiphumela emihle kuphela esingavikela uNtseki,” kubeka umthombo.
UNtseki wethulwe njengomqeqeshi omusha weZimpofana ekuqaleni kwesizini. Uthathe isikhundla sikaZwane obelolonga iqembu.
Lo mqeqeshi oke wapheka iBafana Bafana ubeyinhloko yamaqembu enkulisa aphinde abeyinhloli yeqembu. UZwane akazange axoshwe kodwa wehliselwe esikhundleni sokuba yiphini likaNtseki. Vele bake basebenzisana kuBafana Bafana phambilini.
“Izikhulu zeqembu seziqala ukuwangabaza amandla kaNtseki. Yingakho zisondeza uJohnson. Phela zichithe izindodla kuleli windi zisayina abadlali abanonhlonze kodwa umehluko awubonakali kahle enkundleni,” kusho umthombo.
IChiefs ibingazibekile phansi kuleli windi lokuhwebelana ngabadlali. Isayinise uGiven “Sgiva” Msimango, Pule Mmodi, Tebogo Potsane, Thatayaone Dithlokwe, Mduduzi Mdantsane, Ranga Chivaviro, Jasond Gonzalez, Edson Castillo noSibongiseni Mthethwa.
IChiefs isanda kukhishwa yiSundowns kuMTN8 ehambisana nesamba sika-R8 million. Embangweni wesicoco seligi ivele isiphumile.
Amakhosi alwela ukuqeda isomiso sezindebe. Sekuphele iminyaka esiyishiyagalombili ephuthwa yizicoco. Asebeke ithemba lawo kuCarling Black Label Knockout nakuNedbank Cup.
