AmaBhokobhoko asethubeni lokubuyisa izinduku kuTonga
Ingwazi yaMabhokobhoko uDale Santon ichaza ngokubaluleka kokudlalisa uHandre Pollard ngemuva kokubhacaza kwezibabuli zaleli qembu zigeja oqekelele elakuleli liguqiswa yi-Ireland eStade de France emdlalweni wamaqoqo eNdebe yoMhlaba eqhubeka kwelaseFrance. Amabhokobhoko athelwe othulini yi-Ireland ekleliswe endaweni yesibili emhlabeni ngo-8-13 emdlalweni obubhekwe ngamehlo abomvu.
Izithenjwa zaMabhokobhoko uManie Libbok noFaf De Klerk bageje inqwaba yamathuba okutholela elakuleli amaphuzu.
USanton owayibamba eNdebeni yoMhlaba ngo-2003 kwelase-Australia utshele elaboHlanga ukuthi kungani Amabhokobhoko ewadinga amagalelo kaPollard uma ezimisele ngokuvikela iNdebe yoMhlaba.
“Emlandweni weNdebe yoMhlaba alikho izwe eselake lanqoba iNdebe yoMhlaba lingenaye umdlali ongalibheki ipali odlala endaweni yeshumi (fly-half). Ngowe-1995 ngesikhathi sinqoba iNdebe yoMhlaba satakulwa nguJoel Stransky. Nguyena owavalelela phakathi wonke amaphuzu Amabhokobhoko abhekene neNew Zealand kowamanqamu eNingizimu Afrika. Ngo-2007, uPercy Montgomery noFrans Styen yibona abasinqobela umdlalo wamanqamu ngendlela abakhahlela ngayo. Namanje siyadinga ukuba nomdlali ongalibheki ipali. Ukube besinaye ngempelasonto angingabazi ukuthi i-Ireland besizoyibhinxisela nxanye. Yingakho kufanele sibuyise uPollard ukuya phambili,” kuchaza uSanton owadlala nakumaBulls.
NgeSonto ngo-9 ebusuku, Amabhokobhoko azodudulana neTonga emdlalweni wokugcina wamaqoqo eStade Velodrome.
“Ukubuya kukaPollard eqenjini kuzokwehlisa ingcindezi kuManie. Uzodlala ngokukhululeka azi ukuthi ukhona uPollard uma sithola amathuba okukhahlelela amaphuzu. Ngaphandle kokugeja, uManie usadlala kahle. Kowokuqala uqokwe njengomdlali ovelele. Kowesibili nguyena owakhele uCheslyn Koble ithuba lokushaya itry. Umqoka empumelelweni yeqembu lesizwe. Usedinga uPollard ukuzokwehlisa umthwalo emahlombe akhe,” kuqhuba uSanton.
Ngemuva kwemidlalo emithathu, Amabhokobhoko aseqoqe amaphuzu ayishumi. Aqumbe phansi iScotland ngo-18-3 emdlalweni wokuqala kwathi kowesibili abhubhisa iRomania ngo 76-0. Ngeledlule ashaywe yi-Ireland ngo 13-8.
“Ukuhlulwa yi-Ireland kusho ukuthi kungenzeka sihlangane neFrance kumaquarterfinal. Ngendlela esefomini ngayo iFrance bengingancamela iNew Zealand kodwa akusekho ukujikela emuva. Mhlawumbe kube yinto enhle ukudliwa yi-Ireland. IFrance ingosokhaya. Angeke uthande ukudlala nayo kowamanqamu phambili kwabalandeli bayo. Kungcono usheshe utholane nabo uqede ngabo. Ingcindezi ikubona njengosokhaya. Phela akujwayelekile ukuthi izwe elisingethe iNdebe yoMhlaba lidliwe ekhaya kowamanqamu. Asethembe ukulimala kukakaputeni wabo (u-Antione Dupont) kuzobaphazamisa,” kulandisa uSanton.
Amabhokobhoko abheke ukuba yiqembu lesibili ukuvikela isicoco seNdebe yoMhlaba ngemuva kwama-All Blacks. Ngowezi-2011 aba ngompetha kwathi ngowezi-2015 asivikela ngempumelelo isicoco sawo. Njengamanje elakuleli libambane neNew Zealand ngezicoco ezintathu. Uma ephumelela azoba yizwe elinezicoco eziningi (ezine).
“Sizozigwazela ibhece kuTonga. Angiboni sishaya amaphuzu angaphansi kwangama-50. Iqembu lethu liqine kakhulu. Phezu kwalokho sinezindlela eziningi zokudlala okwenza kubenzima ekutheni izitha zisihlelele. Osekumqoka manje wukuthi silwele ukuhamba phambili bese sivula noma igebe lamaphuzu phakathi kwethu nezitha. Okwamanje siseza kahle. Asilungise indlela yokukhahlela bese siqhubeka ngokudlala ngendluzula,” kuphetha uSanton.
