UPutin ushayelele isipikili esibophezela amasosha
UMengameli uVladimir Putin uyalele amasosha eWagner ukuthi asayine isifungo sokwethembeka kwiRussia ngemuva kwengozi yendiza okukholakala ukuthi yabulala uYevgeny Prigozhin, isikhulu saleliqembu lamasosha. UPutin usayine lesi sinqumo esiletha ushintsho ngokushesha ngoLwesihlanu ngemuva kokuthi iKremlin ithe iziphakamiso zaseNtshonalanga zokuthi uPrigozhin ubulawe ngemiyalo yayo “zingamanga aluhlaza”. IKremlin yenqabile ukukuqinisekisa ukushona kwakhe yathi isalinde imiphumela yokuhlolwa.
Isikhulu sezindiza eRussia sithe uPrigozhin ubegibele indiza yangasese ephahlazeke ngoLwesithathu kusihlwa enyakatho-ntshonalanga yeMoscow kungekho noyedwa osindile ngemuva kwezinyanga ezimbili ehole ukuvukela umbuso okuhlulekile kuzikhulu zamasosha aseRussia.
UMengameli uPutin uthumele amazwi enduduzo emindenini yabashone engozini ngoLwesine futhi wakhuluma ngoPrigozhin esikhathini esedlule. Ubalule “imininingwane yokuqala” ekhombisa ukuthi uPrigozhin nabalingani bakhe abaphezulu kwiqembu iWagner bafile kwindiza futhi, ngenkathi encoma uPrigozhin, wathi wenze “amaphutha amakhulu.” Ukwethulwa kukaPutin kwesifungo esiyisibopho sabasebenzi beWagner nabanye osonkontileka bezempi abazimele kwakuyisinyathelo esicacile sokuletha la maqembu ngaphansi kokulawulwa kombuso.
Lesi sinqumo, esishicilelwe kuwebhusayithi yeKremlin, sibophezela noma ngubani owenza umsebenzi egameni lezempi noma osekela lokho iMoscow ekubiza ngokuthi “ukusebenza kwayo okukhethekile kwezempi” e-Ukraine ukuthi afunge isifungo sokwethembeka eRussia. Kuchazwa kulo mthetho njengesinyathelo sokwakha izisekelo ezingokomoya nezokuziphatha zokuvikela iRussia, amagama esifungo ahlanganisa umugqa lapho labo abasithathayo bathembisa ukulandela ngokuqinile imiyalo yabaphathi nabaholi abaphezulu. Osopolitiki nabahlaziyi baseNtshonalanga baphakamise, ngaphandle kokwethula ubufakazi, ukuthi uPutin uyalele ukuthi uPrigozhin abulawe ukuze ajeziswe ngokwethula ukuvukela umbuso ngoNhlangulana zingama-23-34 ngokumelene nobuholi bamasosha nabo
amele inselelo enkulu ekubuseni kukaPutin kusukela aqala ukubusa ngowe-1999.
Okhulumela iKremlin uDmitry Peskov uthe ngoLwesihlanu lokhu kusolwa nokunye okuningi okufana nakho kungamanga. “Manje sekunokuqagela okukhulu mayelana nokuphahlazeka kwendiza nokufa kabuhlungu kwabagibeli bendiza, okuhlanganisa noYevgeny Prigozhin. Yebo, emazweni aseNtshonalanga, konke lokhu kuqagela kuvezwa ngendlela eyaziwayo,” kusho uPeskov etshela izintatheli.
“Konke lokhu kungamanga aluhlaza, futhi lapha, uma ukhuluma ngalolu daba, kufanele uzibekele amaqiniso. Awekho amaqiniso amaningi okwamanje. Kumele atholwe amaqiniso njengoba kwenziwa uphenyo,” usho kanje.
