Izinkakha ebholeni ziconsa amathe ngokuqeqesha Amakhosi aphikwa izinto
Ngeledlule uNtseki uphume eseqashiwe njengoba abalandeli bebemjikijela. Sigaqelwe yizinkunzi zabaqeqeshi isikhundla sokucija iKaizer Chiefs ephikwa yizinto kule sizini entsha yeDSTV Premiership. Amakhosi adonsa ngodilizi kulezi zinsuku. Aphikwa yimiphumela osekuholele ekutheni abalandeli bavukwe wubumdlwebhe. Ngesonto eledlule badinelwe kumqeqeshi weqembu uMolefi Ntseki ophume ngesamagundane eMbombela Stadium ngesikhathi Izimpofana ziguqiswa yiTS Galaxy ngo 1-0 emdlalweni weligi. UNtseki uthathe isikhundla sokulolonga iChiefs ekuqaleni kwesizini. U-Arthur Zwane obeshayela umkhumbi wehlisiwe esikhundleni.
Useyiphini likaNtseki ngokubambisana noDillon Sheppard. Ngesikhathi uNtseki ethulwa njengomqeqeshi weqembu abalandeli badinwe bagana unwabo bekhombisa ukungasithakaseli isinqumo sabaphathi beqembu. Iqale isizini bevele bewangabaza amandla kaNtseki njengoba ngeledlule bephethe ngokumjikijela ngezigubhu. ElaboHlanga lihoshe izindaba zokuthi izikhulu zeChiefs zikhathazekile ngesimo sikaNtseki. “Izikhulu zeqembu zikhathazekile.
Zihlela ukuqala umkhankaso wokuthungatha umqeqeshi onamava. Okwenza zikhathazeke wukuthi cishe yonke imidlalo yeqembu igcwala ithi phama. Manje abafuni ukugcina bebeka uNtseki engcupheni. Phezu kwalokho iqembu lizoqhuma ephakethe ngoba uZola Majavu akasineki. Yingakho izikhulu zeqembu zicabanga ukubuyisela uNtseki esikhundleni sakhe bese zilethela umqeqeshi osemnkantshubomvu. NgoMsombuluko ihhovisi leChiefs lithole inqwaba yezicelo zabaqeqeshi abahlukene abakhombisa intshisekelo yokuthatha lesi sikhundla,” kuchaza umthombo.
IChiefs sekuphele iminyaka eyisishiyagalombili ikhungethwe yisomiso sezinkomishi. Yagcina ukuphakamisa inkomishi ngaphansi kobuholi bukaStuart Baxter ngo-2014/15 idla ubhedu kuMTN8 naku-Absa Premiership. Ngemuva kwalokho abaqeqeshi abalandele ngemuva kwakhe okubalwa uSteve Komphela, uGiovani Solinas, u-Ernst Middendorp, uGavin Hunt, Baxter noZwane bonke bahluleke bancama ukuletha izicoco.
“Phakathi kwabaqeqeshi abafuna lesi isikhundla kukhona igama likaRuud Krol, uMicho Sredjovic, uLuc Eymael, uDan Malesela, uCedric Kaze noMario Marinica. Bonke la baqeqeshi bazifakile izicelo zabo ehhovisini likaKaizer Junior Motaung. Kulabaqeqeshi nguMicho kuphela onomsebenzi. Ucija iqembu lesizwe lase-Uganda kodwa inkontileka yakhe iyaphela ngenyanga ezayo,” kuchaza umthombo.
UKrol wazakhela ugazi eqeda isomiso sezindebe ku-Orlando Pirates ngo-2010/11.
EZimnyama kwasekuphele iminyaka ayisishiyagalombili zishwiba izandla kodwa uKrol wafika waphendula amatafula. Njengamanje uzihlalele ekhaya eMalaga, eSpain okuyilapho azinze khona.
“Njengamanje izikhulu zeChiefs azikasithathi isinqumo sokuthi yimuphi umqeqeshi ongafika nesisombululo kulezi zinkinga ababhekene nazo kulaba abafake isicelo somsebenzi. Abasafuni ukwenza iphutha ngoba bazophenduka inhlekisa emphakathini. Yingakho bengafuni ukuxhamazela. Bafuna ukuba nesiqiniseko ngomuntu abazomletha,” kubeka umthombo.
UMarinica odabuka eRomania usanda kugila izimanga neqembu lesizwe laseMalawi elifaka ku-last 16 ye-Africa Cup of Nations. Emqhudelwaneni ofanayo wabamba ompetha iSenegal. Inkontileka yakhe iphele ngoNdasa neMalawi wase ethatha isinqumo sokungayivuseleli. Kusasa ngo-5.30 ntambama, Amakhosi azodudulana naMaZulu FC emdlalweni weligi eFNB Stadium.
“Konke sekuncike ezikhulwini zeqembu ngoba abaqeqeshi abafake izicelo zomsebenzi banomlando wokunqoba izicoco. Bonke bafunde bagogoda kwezokuqeqesha. Iningi labo selike lawaqeqesha amaqembu akuleli. Linolwazi ngebhola laseNingizimu Afrika.” kuphetha umthombo.
Izimpofana azikaze zinqobe kule sizini emidlalweni yeligi. Zibanjwe yiChippa United emdlalweni wokuqala weligi kwathi kwemibili elandelayo zakhala ngaphansi.
Ziqunjwe phansi yiMamelodi Sundowns ngo 2-1 ngaphambi kokuthi zithelwe othulini yiRockets ngempelasonto edlule.