“UMhlekazi” ufuna itshe lemali emaqenjini amdingayo
Alokhu eqhubeke njalo nokutheza emakethe amaqembu agijima kuDSTV Premiership ngaphansi kwePremier Soccer League (PSL).
Isizini entsha iyaqala ngenyanga ezayo. Intatheli yelaboHlanga isibhekela ezinoju emakethe.
Sibongiseni “OX” Mthethwa:
UMthethwa ufunwa uthuli yiKaizer Chiefs naMaZulu Football Club. ElaboHlanga lihoshe ngemithombo yalo ethembekile ukuthi Amakhosi noSuthu sebeke baxhumana nezikhulu zeStellenbosch Football Club. UMthethwa usalelwe ngunyaka kanti iStellies sinombandela womunye unyaka uma le nkontileka isiphela. ElaboHlanga lihabule izindaba zokuthi iStellenbosch ayibhekile ukuhlomula imali engaphansi kwezigidi ezi-R6 ngoMthethwa. Sekusele kula maqembu amabili ekutheni ashaye iphakethe ukuze akwazi ukuthola lo mdlali, owenza kahle kuBafana Bafana edlala iCosafa Cup.
Andile “Mhlekazi” Jali:
Kukhalwa ngetshe lemali efunwa yisibabuli somdlali ogaqelwe yinqwaba yamaqembu adlala kuDSTV Premiership.
Leli phephandaba lithole ngemithombo yalo ethembekile ukuthi uJali ufunwa yiSwallows, AmaZulu FC neStellenbosch FC. Womathathu la maqembu aseke axhumana nemenenja yakhe uMike Makaab weProSport International.
UKomphela usebenze kakhulu noJali eqenjini lesizwe nakuMamelodi Sundowns. Useke wamthinta mathupha uJali. Le njini yomdlali ivule izandla ukujoyina uKomphela kodwa konke kuncike ekutheni iSwallows izokwazi yini ukumnika lokhu akufunayo.
Khama Billiat:
Akasaziboni ebuyela kuKaizer Chiefs ayisola ngokumdelela. Inkontileka kaBilliat neChiefs iphelile ngenyanga eyedlule. Kuvela izindaba zokuthi iChiefs imehlisele umholo. Phezu kwalokho ibifuna nokumnika inkontileka yonyaka. UBilliat uyikha ngamahalavu kuChiefs. Kusukela ajoyina leli qembu izinga lakhe livele lehla ngendlela eyisimanga. Lo mdlali odabuka eZimbabwe simnengile isenzo seChiefs okuholele ekutheni alidube iqembu. Kumanje uxoxisana neRoyal AM, neYoung African yaseTanzania.
UGabadinho Mhango no-Abbubaker Mobara:
Bathungathelwa amakhaya amashaya abadlali ababili baMaZulu abasolwa ngokuhlupha uMhango noMobara. Izikhulu zoSuthu zikhulumile nezimenenja zabo uMike Makaab noRob Moore ekutheni baqale babathungathele imisebenzi kwamanye amaqembu. UMhango usolwa ngokuthanda impilo yasebusuku kanti ngakolunye uhlangothi uMobara kubikwa ukuthi uyihlongandlebe.