Amakhosi ajike endleleni ngeqembu likaVan Wyk
Ukaputeni weBanyana Banyana uJanine Van Wyk uphumela obala ngamahlebezi okushelwa yiKaizer Chiefs.
ElaboHlanga lixoxe noVan Wyk engxoxweni ekhethekile ngodaba lokumataniswa kweqembu lakhe iJanine Van Wyk Football Club naMakhosi.
IChiefs kuvela izindaba zokuthi ibisezinhlelweni zokuthenga iJWV. Amakhosi asezinhlelweni zokuba neqembu labesifazane.
“Yebo, zike zabakhona izingxoxo phakathi kwami nezikhulu zeChiefs. Bebefuna ukuthenga iqembu lami. Bengivule izandla. Sihlalile etafuleni kodwa ekugcineni asizange sivumelana,” kusho uVan Wyk.
IConfederation of African Football (CAF) isiyiqinisile imithetho yokuphathwa kwamaqembu. Le nhlangano isiqhamuke nombandela wokuthi amaqembu adlala emiqhudelwaneni yeCaf abenamaqembu abesifazane kungenjalo angazithola esekhishwa ngaphandle kulo mqhudelwano.
“Bengingeneme ngemali abebeyibeka etafuleni. Leli qembu ngisuka kude nalo. Njengamanje selithathwa njengamanye amaqembu amakhulu ebholeni labesifazane. Angeke nje ngimane ngilidedele kalula. Ngokwezinga libalwa namaqembu afana noKaizer Chiefs, Orlando Pirates neMamelodi Sundowns uma ngiliqhathanisa nabesilisa. Ngakho uma kukhona ofuna ukulithenga kumele azimisele ngokubeka isicelo esiconsisa amathe etafuleni ngoba nami ngisanezinhloso ezinkulu ngaleliqembu,” kubeka uVan Wyk.
IMamelodi Sundowns, iTS Galaxy Football Club neRoyal AM amaqembu agijima kuDSTV Premiership ashaya ngamaqembu asifazane.
“IChiefs iyakwazi esikufuna kuyona. Uma isinika lokho esakucela kuyona asinankinga yokudayisa noma ukuhlala nayo phansi siphinde sixoxisane. Ngalokho asisho ukuthi sesigxile ekudayiseni iqembu. Njengoba ngishilo sinezifiso ezinkulu ngeqembu. Sifuna ukwenza izinto ezinkulu ngalo. Kula maqembu adlala kuCaf njengamanje alikho eselike lasithinta mayelana nokuthi sisebenzisane,” kuchaza uVan Wyk.
I-Orlando Pirates izosebenzisana neNyuvesi yaseGoli (UJ) kule sizini bese kuthi iSekhukhune United ibambisane neNyuvesi yaseNorth West. Ngakolunye uhlangothi iSuperSport United izobambisana neTUT.
“Ngeneme ngesenzo seCaf sokuphoqa amaqembu adlala emiqhudelwaneni yayo ukuthi abenamaqembu abesifazane. Ngeke sikubalekele ukuthi ibhola labesifazane liyadlondlobala. Likhula ngesikhulu isivinini.” kuphetha uVan Wyk.