Kubantu bas’Othukela eyamanzi iyisilonda esingelapheki
Bathemba ukuthi ingqungquthela eqhubeka eThekwini izoza nezixazululo
Kubantu abakhele uMasipala wesiFunda uThukela KwaZulu-Natal ukubanjwa kwenkulumongxoxo yezinsuku ezine edingida udaba lwamanzi kuzwelonke kuyobe kungasho lutho uma ingakalungiswa inkinga yeminyaka yamanzi kulo masipala. Ngokusho komphakathi kunezingxenye ezithile ezingaphansi kwalo masipala osekuphele iminyaka ziphila ngaphansi kwesimo esinzima ngenxa yokunguleka kwamanzi.
Kusukela izolo kuze kube uLwesihlanu kubanjwe ingqungquthela ebizwa ngeNational Water and Sanitation Youth Indaba e-INkosi Albert Luthuli International Convention Centre. Le ngqungquthela iyingxenye yokubungaza inyanga yentsha ezweni. Kubanjwa le ngqungquthela nje, kubantu basoThukela inkinga yamanzi isiyaphenduka isilonda esingelapheki. Umphakathi ubalise ngosizi lwawo lweminyaka emsakazweni wezinkulumongxoxo ISAfm olubizwa ngeMunicipal Watch onhloso yalo okungukwelusa ukusebenza komasipala ezweni.
Umphakathi waseMnanbithi uthe usuphila ngokuwathenga amanzi ngoba kuyenzeka kokunye iloli liphelele ezindaweni ezithile ezingaphansi kweqembu elithile lezepolitiki. Omunye umlaleli uthe ngesonto usebenzisa imali eyi-R200 ngokuthenga amanzi ngoba ikhansela labo alikufihli ukuthi kumele kube ngabantu beqembu lalo abathola amanzi kuqala.
IMeya yesiFunda ebuyingxenye yohlelo ivumile ukuthi zikhona izinselelo zamanzi kepha bayazilungisa. Intatheli yephephandaba lomphakathi iLadysmith Gazette ithe, inolwazi lokuthi ziningi izindawo ezisantula amanzi futhi abantu bayalishayela njalo iphephandaba belazisa ngokuqhubekayo. Umphakathi walapha unethemba lokuthi hleze ingqungquthela iphume nesisombululo kule nkinga obhekene nayo. Akuyona indawo yas’Othukela kuphela ekhungethwe inkinga yamanzi, kepha ezingxenyeni ezihlukene zesifundazwe kukhalwa esifanayo.
Lengqungquthela evulwe uNgqungqoshe Wezamanzi Nenhlanzeko uMnu uSenzo Mchunu, ihlanganisa abamele izinhlaka zezamanzi njengoMgeni noMhlathuze Water. Okunye okubhekiwe ukuthi yimaphi amathuba intsha engahlomula kuwo ezinhlelweni zikahulumeni ezithinta amanzi. ElaboHlanga lizonaba kabanzi ngalolu daba oshicilelweni lwangoLwesihlanu.