Kukhona abakhalayo kwabanye kuthi cosololo ngokuvuleka kwewindi
Amaqembu ayaqhubeka nezinhlelo zokuqinisa izikwati ngaphambi kokuqala kwesizini
ElaboHlanga likulethela zona zishisa nentatheli yaleli phephandaba uZipho Singela ozithola njengoba zinjalo.
UJosef Zinnbauer:
Lo mqeqeshi ozakhele igama ku-Orlando Pirates usezingxoxweni neRichards Bay FC esezinhlelweni zokumqasha. ElaboHlanga lihoshe izindaba zokuthi izingxoxo sezikuvuthondaba phakathi kukaSifiso Biyela ongusihlalo weqembu nalo mqeqeshi odabuka kwelemaJalimane. IBay ivele isithathile isinqumo ngoVasil obenikwe inkontileka yesikhashana.
ULuc Eymael:
AmaZulu amemezele ukuthi asehlukene no-Ayanda Dlamini naye obenikwe izintambo isikhashana kuleli qembu. Usihlalo weqembu uSandile Zungu usewuqalile umkhankaso wokuthola umqeqeshi ozovala isikhala sakhe. ElaboHlanga lihoshe izindaba zokuthi uGwabini useke wabamba umhlangano nalo mqeqeshi. Kuvela ukuthi uhlabane umxhwele ngendlela azethule ngaye. UZungu uzohlangana nabanye abaqeqeshi bese ethatha isinqumo emavikini amabili azayo. Njengamanje u-Eymael nguyena ozihola phambili kubaqeqeshi abangase bathathe lo msebenzi.
UYanga Baliso:
Lo mdlali odabuka eGugulethu, eKapa usethathe isinqumo sokunqamula inkontileka yakhe ne-AC Oulu egijima eligini enkulu yaseFinland. UBaliso okhulele enkulisa ye-Orlando Pirates unqamule inkontileka yakhe ngeledlule. Utheleke eNingizimu Afrika ngoMsombuluko ebusuku. Izingxoxo sezikuvuthondaba phakathi kwemeneja yakhe neSekhukhune United yaseLimpopo kodwa ezinze eGoli. Kungenzeka asayine inkontileka yeminyaka emithathu. ISekhukhune yehluleke yancama ukuthola uBathusi Aubaas weTS Galaxy naye odlala indawo efanayo nekaBaliso. U-Aubaas angase aphelele ku-Orlando Pirates. UBaliso udlala phakathi nenkundla, ukwazi ukudlala isisu esimile nesiyaphambili.
UTshegofatso Nyama:
ElaboHlanga lithole izindaba zokuthi ufunwa uthuli yiCape Town City. Lo mdlali weTS Galaxy FC odlala ngakwesokunxele emuva noma phambili ube nesizini enhle. Ngemuva kokulimala kuka-Ebrahim Seedat uyenze eyakhe indawo yangakwesokunxele emuva. Phambilini ubedlala ngasezinhlangothini zombili phambili. ElaboHlanga lithole izindaba zokuthi inkampani emphethe i-QT Sport ibiseKapa ngempelasonto edlule ukuzoqhubeka nezingxoxo. Leli phephandaba lithole ukuthi sekusele kancane kuvunyelwane.
U-Andile Jali:
I-Orlando Pirates isezinhlelweni zokumbuyisa kuleli qembu ngaphambi kokuthi ayodlala phesheya kwezilwandle. Ubegijima kuMamelodi Sundowns kodwa kuhlukanwe kungasekuhle. Lo mdlali odabuka eMatatiele usolwe ngokufika ejimini edle amanzi amponjwana. Ngemuva kwalokho iqembu limhlalise ekhaya. Kuphele isizini engasadlali. Ngeledlule limemezele ukuthi sekuhlukenwe. IPirates ifuna ukumnika inkontileka yonyaka owodwa nombandela wokuyelula uma isiphela.
UGabadinho Mhango:
AmaZulu amanqika ngekusasa lakhe. Izikhulu zeqembu azeneme ngendlela aziphatha ngayo ngaphandle kwenkundla. Kuvela ukuthi ungomunye wamazambane abolile. Okwamanje Usuthu belingakasithathi isinqumo esiqondile. Uma AmaZulu egcina ethatha u-Eymael lo mdlali waseMalawi uzohlala ngoba umqeqeshi uyazifela ngaye. Ukholwa wukuthi usengamvusa.
U-Abbubaker Mobara:
Usenenkontileka neqembu kodwa izikhulu azeneme ngendlela yakhe yokuziphatha. Inkinga akusilo uphuzo oludakayo kodwa ikhanda eligxabhayo. ElaboHlanga lithole izindaba zokuthi ukhuluma noma yikanjani. Yingakho izikhulu zicabanga ukumdedela. Naye kuzoncika ekutheni ngubani othatha izintambo zokuqeqesha.
UKabelo Mahlasela:
IRoyal AM isivuselele inkontileka kaMahlasela ngonyaka owodwa. ElaboHlanga lithole ngemithombo yalo engaphakathi kuleli qembu ukuthi uMahlasela welule inkontileka yakhe ngonyaka owodwa. Ibiphela ekupheleni kwenyanga. Iqembu belinombandela wokuyelula ngonyaka. Seliwusebenzisile lowo mbandela.