Uhosha imfe kulokhu umpetha wanyakenye kuHarry Gwala Marathon



UMaphumulo uyintatheli yezemidlalo.
U-Ayanda Ngcobo obe ngumpetha weHarry Gwala District Marathon nyakenye ngeke aze akwazi ukuvikela isicoco sakhe nonyaka. UNgcobo uzisholo ngokwakhe ngesikhathi enengxoxo ekhethekile nelaboHlanga. Umjaho iHarry Gwala District Marathon kulindeleke ukuthi ibe ngeSonto, izobe isukela e-R612 Highflats iphelele eMzimkhulu College.
“Ngeke ngibe khona kwiHarry Gwala District Marathon kusukela ngePrince Mangosuthu Ultra Marathon ebingenyanga edlule angizizwa kahle. Nomjaho angiwuqedanga, emva kwezinsuku ezimbili ngazibona sengiqalwa izinto emzimbeni ngiqubuka. Ukungabibikho sesimeni esihle kungenze ngangakwazi ukuzilungiselela lo mjaho ozokuba ngeSonto. Kubuhlungu ngoba abantu bebelindele ukuthi ngivikele, nami benginethemba lokuthi ngizoba yingxenye yayo iHarry Gwala District Marathon yalonyaka” kusho uNgcobo.
Lo msubathi wanqoba iHarry Gwala District Marathon nyakenye ngesikhathi esiwu-02:18:08 ebangeni lama-42km. Walandelwa uNdumiso Sokhela owaqeda ngesikhathi esiwu-02:18:09, kwathi kweyesithathu kwaba uTonny Skink ngesiwu-02:20:04.
Kwabesifazane khona kwaphuma phambili uKoech Chepkosge ngesiwu-02:58:25, uMakhosi Mhlongo esiwu-03:03:05 kwaba uCollett Lisa ngesiwu-03:03:30.
UMandla Mngomezulu oyisikhulu esiphezulu seXcel Running Club okuyikilabhu uNgcobo agijima ngaphansi kwayo uziqinisekile lezi zindaba. “Kuliqiniso ukuthi amasonto edlule uNgcobo akabanga nesikhathi esihle, kusukela kumjaho wePrince Mangosuthu Ultra Marathon. Sekungaba ukumosha isikhathi makungathiwa siyamyisa, ngoba vele ngeke akwazi ukuvikela isicoco sakhe ngendlela afisa ngayo ngoba akazilungiselanga kahle” kusho uMngomezulu ophinde abe isekela Mengameli weKwaZulu-Natal Athletics (KZNA).
Omunye umsubathi ongeke abonakale kulo mjaho, uSokhela ophume endaweni yesibili nyakenye. Ekhuluma nelaboHlanga uthe: “Ngeke ngibonakale ngeSonto kwiHarry Gwala District Marathon, isizathu salokho ukuthi manje ngizilungiselela iComrades Marathon. Bengifisa ukugijima kodwa umqeqeshi wami uthe ngeke ngikwazi. Ngifisela bonke abazogijima okuhle kodwa” kubeka uSokhela ogijima ngaphansi kweMr Price kanti uke wagijima kwiXcel Running Club.
Ilinganiselwa kwizinkulungwane ezingama-R400, imali ezotholwa abanqobile. Ozonqoba ebangeni lika-42,2km uzogoduka nezinkulungwane ezingama-R50, kwelika-21,1km ahambe nezili-R10, kwelika-10km ahlomule ezi-R5.