Kufezeke iphupho leminyaka kuMnyamane esayina kwezikaMagebhula
Akazange ananaze kuvela ithuba wagxuma wahlala
Usephothule yonke into ne-Orlando Pirates, uMelusi Buthelezi ongunozinti weTS Galaxy Football Club.
IRockets idonsa ngodizili ngasezimalini. Ekuqaleni konyaka abasebenzi nabadlali bake bangahola izinyanga ezimbili zilandelana.
Usihlalo weqembu usethathe isinqumo sokudayisa abadlali beqembu abanohlonze ukuze enze inzuzo.
Izimpimpi zelaboHlanga ezingashayi eceleni zihlebele leli phephandaba ukuthi uButhelezi useyogijima kweZimnyama.
“NgoLwesine unozinti weGalaxy, uButhelezi usayine inkontileka yeminyaka emithathu nePirates. Ubizelwe ehhovisini likaTim Sukazi eSandton, eGoli. Ufike watshelwa ukuthi iqembu seliqede konke nePirates. Umfana uthe uma ebuka inkontileka abeyinikwa yiPirates wavele wangananaza. Uyisayine ngaleso sikhathi,” kuchaza umthombo.
UButhelezi usanda kuvuselela inkontileka yakhe neGalaxy. Ugqame ngesizini edlule esiza iRockets ekutheni ivike izembe. Inkontileka yakhe uyelule ngeminyaka emithathu.
“IPirates ibeke itshe lemali etafuleni. Ibeke imali elinganiselwa kwizigidi ezi-R3,5. USukazi akazange acabange kaningi. Usamukelile isicelo sePirates wayisayina inkontileka. Obesekusele wukuthi umfana avumelane ngezimfuno zakhe nePirates. Nangempela naye uButhelezi akazange adembesele,” kuqhuba umthombo.
EZimnyama zizohlukana noSiyabonga Mpontshane uma kuphela isizini. Inkontileka yakhe neqembu iyaphela ngenyanga ezayo.
“IPirates ivele isisithathile isinqumo ngekusasa likaMpontshane. Angeke iyivuselele inkontileka yakhe. URichard Ofori naye angase ashiye ngoba akavumelani nezikhulu mayelana nezimfuno zakhe. IPirates yeneme ngoSipho Chaine noButhelezi. Kungenzeka banyuse omunye wonozinti eqenjini lenkulisa ukwandisa nokuqinisa umbango emapalini,” kuchaza umthombo.
UButhelezi kubhekwe ukuthi aqokelwe emklomelweni kanozinti ovelele lapho ezoqhudelana khona noRonwen Williams weMamelodi Sundowns noSamil Magoola weRichards Bay FC.
“Ubevele engasaneme kuGalaxy. Ubekhala ngokuthi wenza kahle kodwa imali ayitholayo ayimfanele. Kufezeke iphupho lakhe leminyaka ngoba ukhule evele eseka yona iPirates,” kusho umthombo.
Lo nozinti odabuka eNquthu usebizwa nakuBafana Bafana. IGalaxy idayisa uButhelezi kuPirates, muva nje isanda kuvumelana neKaizer Chiefs noGiven Msimango.
Lesi sitobha naso sisayine inkontileka yeminyaka emithathu kuChiefs. Naso kubhekwe ukuthi singasali uma sekuqokwa abadlali abathathu abazoqhudelana emklomelweni womdlali wasemuva ovelele. IChiefs kuvela ukuthi ihlukane no-R3 million ngoMsimango.
Njengamanje iGalaxy ihlushwa yiCape Town City efuna uthuli uTshegofatso Nyama neSekhukhune ebabelesele ngoBathusi Aubaas noSphiwe Mahlangu.
“USukazi ubona kuyiyona ndlela abazokwazi ukuphuma ngayo ezikweletini ukudayisa abadlali abanohlonze.” kuphetha umthombo.
