UMbele angase avumbuke kuSekhukhune
Singase sivumbuke kuSekhukhune United isikhulu esishiye isinyenyela ku-Orlando Pirates uFloyd Mbele.
NgoMsombuluko ntambama eZimnyama zimemezele ukuthi uMbele usule isigubhukane kuleli qembu.
Kungokwesibili eshiya isikhundla sakhe kweZimnyama. Phambilini wake wenza okufanayo.
Walaxaza iBhakaniya wajoyina iPlatinum Stars. Wayisiza yakhala yemuka nesicoco seMTN8 neTelkom Knockout beshaya yona iPirates.
Izimpimpi zelaboHlanga zitshele leli phephandaba ukuthi uMbele angase ajoyine iSekhukhune. “UMbele kudala aqala izingxoxo neSekhukhune. Leli qembu lifuna ukulwela izicoco kumasizini azayo ngenxa yokuthi lichithe izindodla kwakhiwa. Likholelwa ekutheni ukuletha umakadebona ofana noMbele kungalisiza ekutheni lifeze isifiso salo,” kuchaza umthombo.
ISekhukhune ikhuphukele esigabeni esiphezulu kumasizini amabili adlule kulandela ukudla ubhedu kuMotsepe Foundation Championship.
Leli qembu lisethubeni lokuvala isizini ngesicoco. Lizobhekana neStellenbosch kowandulela amanqamu eNedbank Cup.
Uma liphumelela lizodudulana nozonqoba phakathi kwezinkunzi zaseSoweto, iKaizer Chiefs ne-Orlando Pirates kowamanqamu.
INedbank Cup ihamba nesamba sika-R7 million nebhonasi lokuyodlala kuCaf Confederation Cup. “Selokhu iqembu lingene esigabeni esikhulu lithenga abadlali abanohlonze. Lithenge abadlali abafana noWillard Katsande, Linda Mntambo, Kamohelo Mokotjo, Tshegofatso Mabasa, Philani Zulu, Siphosakhe Ntiyantiya, Daniel Cardoso, Edwin Gyimah, Nyiko Mobbie noVictor Letsoalo bonke abaphuma emaqenjini amakhuly futhi abanye babo sebedlale nasemaqenjini abo esizwe. Abaphathi beqembu bafuna ukuliqinisa nxazonke iqembu,” kuchaza umthombo.
Nasemidlalweni yeligi, iSekhukhune izinto ziyihambela kahle. Ngempelasonto edlule iqumbe phansi iKaizer Chiefs ngo 1-0 emdlalweni weDSTV Premership. Bekungokwesibili kule sizini leli qembu ligila Amakhosi kweyeligi.
Lomphumela ukhuphulele iqembu endaweni yesithupha kulogi. Linamaphuzu angama-35 emidlalweni engama-26 yeligi.
“Kungenzeka athulwe ngokusemthethweni uma kuqala isizini ezayo. UMbele nguyena ozoba yisikhulu esiphezulu eqenjini. Uzosebenzisana noJonas Malatjie ekusayineni abadlali,” kusho umthombo.