Now Reading
Iseyiva elingabanguleki eyabamaloli yokuqasha abashayeli bokufika
Dark Light

Iseyiva elingabanguleki eyabamaloli yokuqasha abashayeli bokufika

UMnu uMandla Mngomezulu

Iva elingabanguleki elihlaba abasembonini yezokuthutha emkhakheni wamaloli lihlala njalo livuza iminjunju nokunkenketha yize kuba nokungenelela kosopolitiki okuba okwesikhashana.

Kuleli sonto abashayeli bamaloli ezweni basabise ngokungenela isiteleka esingaphazamisa ukuthunyelwa kwempahla. Uma lesi siteleka siphumelela kungase kume nse ukusebenza echwebeni elikhulukazi emtateni eThekwini naseRichards Bay.

Kuzobe kungekona okokuqala abamaloli bevala izwe. Sekukangi bekhala esifanayo ngabakubiza ngokuthathelwa imisebenzi ngabashayeli abaphuma emazweni angaphandle. Kulokhu basola izinkampani ngokubalekela ukukhokha zisebenzise abashayeli bangaphandle, iningi labo abasuke bengenazo izimvume zokusebenza eNingizimu Afrika.

Okunye abakushoyo ukuthi abashayeli bangaphandle basetshenziswa amahora amade akukho nemihlomulo abayitholayo ezinkampanini njengamamedical aid, izindlu nempesheni ngoba abanawo amaphepha aqondile asemthethweni.

UMnu uMusa Nombika waseTshelimnyama, odabuka eFafa Mission eSouth Coast oseneminyaka engama-22 eshayela amaloli uthi usesebenzele izinkampani ezimbili ezahlukene.

Utshele elaboHlanga ukuthi esikhundleni sokuba impilo yakhe ibe ncono kwenzeka okuphambene. “Thina sifana nabantu ababulewe bephila ngendlela esiphethwe ngayo. Uma uke waphakamisa ikhanda ukhala ngokuthize abaqashi abalilindi ibhadi bakutshela emehlweni ukuthi iminyango ivuliwe, baningi abantu abalambile la ngaphandle.”

Kuzikhalela uNombika. Uthi abashayeli bangaphandle yibo ke ababusayo ngoba le mali thina esikhala ngayo kubona izulu nomhlaba.

Uthi ngisho bengena ngezinyunyana abaqashi babatshela ukuthi bazoohelelwa umsebenzi ngoba uhulumeni ungakubo, angeke wakubekezelela ukuvalwa kwezwe ngenxa yabo.

Inhlangano ebhekele abamaloli  iTruckers Association of South Africa ikubeke kwacaca ukuthi izothola izindlela zokuxoxisana nabashayeli ukugwema okungase kwenzeke. Le nhlangano emele abaqashi kule mboni ithe izozama ngakho konke ukuhlala etafuleni ngoba ngesikhathi abashayeli bengenela isiteleka phambilini, umnotho washayeka kakhulu futhi kukhona nabalahlekelwa yimisebenzi.

See Also

Inhlangano yabashayeli i-All Truck Drivers Forum ithi kuningi okungakungisiwe kulokho osekuneminyaka ikhala ngakho. Ithi okunye osekuqubuke muva nje uhlelo olusetshenziswa abaqashi lokulayisha abangahambisani nalo.

Osebuholini kule nhlangano uMnu uMandla Mngomezulu uthi ithimba elaqokwa ukuba licubungule izikhalo zabo bese liza nezisombululo, lehluleke lancama ukuhlanganisa imihlambi eyalanayo izinkinga zisamile.

“Leli thimba elihlanganisa nongqongqoshe akukho nokukodwa eliphumelele ukukwenza, yingakho abashayeli bamaloli bezithole kungekho okunye abangakwenza ngaphandle kokuhlangana kubhekwe ukuthi isiteleka singeke yini saba yimpendulo ezinkingeni zabo.”

Kuphawula uMngomezulu. UMengameli weThe Truckers Association uNks uMary Phadi uthi isiteleka sizoshaya sizwele emnothweni wezwe nasemphakathini. “Yinto engabuzwa ukuthi isiteleka sizosithinta kakhulu, ikakhulukazi umnotho wezwe ovele untengantenga. Ngaphezu kwalokho singabona nokuthungelwa ngomlilo kwamaloli, okungagcina sekukapakela nasemphakathini ngoba amaloli asuke ethwele okuyizidingo zawo zansukuzonke, okungase kwenzeke ukuthi uma isiteleka siqala kuyoba nzima ukusiqeda.”

Scroll To Top