Unesifiso sokugcina eselingisa ezingeni lomhlaba ngesiZulu

Amaciko ngokwehlukana kusuka kubaculi, abalingisi, abadwebi nabanye isifiso sabo esikhulu kusuke kuwukusabalala beqe imingcele yamazwe abo. Okusuke kusemqoka kubo ukwenza  konke lokhu ngolimi lwabo njengoba kwenza abanjengomculi waseMali uSalif Keita, uNozindaba wakuleli uGcina Mhlophe oxoxa izindaba ngesiZulu noma ebuye athi thasi ngesiLungu. Nomlingisi wakuleli uPallance Dladla kungekudala uzonabela nasemazweni ase-Afrika.

UDladla usemkhankasweni wokunabela kumazwe ngamazwe. Ungohlukile entsheni yanamuhla. Le nsizwa yafunda ezikoleni ezazaziwa ngama model C kodwa ulimi lwayo isiZulu ayilokothi isixube nesiLungu. Ungene kulezi zikole esemncane waze waphothula umatikuletsheni eParktown Boys High. Wazalwa zingama-22 kuMandulo we-1992 eGoli. Umsebenzi wokulingisa uwenza ngokugcwele. Uma engalingisi usuke enza izikhangisi zemikhiqizo ehlukene ezikhonjiswa kuthelevishini nasemsakazweni. Useke wabonakala emidlalweni eminingi ewuchungechunge okukhona kuyo i4Play:Sex Tips for Girls, Intersexions, ISibaya, Rhythm City, Isithunzi. Ukuvelela kwakhe okukhulu kwabonakala emdlalweni iHard to Get ngowezi-2014. UDladla uphinde wazakhela abanye abalandeli emdlalweni owuchungechunge esiteshini esikhokhelwayo iNetflix iShadow elingisa indawo kaShadrack Khumalo.

Phakathi kwemiklomelo aseyizuzile emkhakheni wezokulingisa kukhona oweSAFTA Award. Waphinde waphuma endaweni yesithathu kwisizini yesibili yeClass Act. Wakhala ngaphansi ehlulwa u-Abdul Khoza nenkakha uTumie Ngumla, agcina esesebenzisa naye kuSABC 1 emdlalweni iTempy Pusha. UMgabadeli akakufihli ukuthi ulimi lwakhe lumqoka futhi akukho okuyomhlukanisa nalo. Ngesikhathi elingisa kuSibaya kube neziwombe eziningi lapho ezakhele khona ugazi kubabukeli.