Kusewumqansa kosomabhizinisi ukuthola uxhaso
Ukuthola uxhaso lwezimali kusalokhu kuyisikhubekiso esikhulu kubanikazi bamabhizinisi abasafufusa, abaningi babo abanobuhlakani obusha bokushintsha imidlalo obungaxazulula izinselelo zezwe ezifana nenkinga kagesi.
Abanye osomabhizinisi abasafufusa baseMahikeng eNorth West bathi sekuphele iminyaka bengqongqoza bengalutholi uxhaso ngempumelelo.
Omunye wabo nguMpho Moloko oneminyaka engama-34 osungule i-generator engawusebenzisi uphethiloli. “Okwenza le-generator ihluke wukuthi ayiwasebenzisi ama-fossil ukuze isebenze. Ayidingi futhi ukuthi uyishaje ngoba uma isebenza igcwalisa yona ngokwayo. Engikushoyo, ayiwasebenzisi ama-fossil fuels, ngisho ukuthi ayisebenzisi uphethiloli, udizili noma i-bio-gas ukusebenza. Ubude bempilo busukela phakathi neminyaka engama-20 ngaphandle kokulungiswa. Uma kwenzeka kuba nokulungiswa okudingekayo, sizokwazi ukuza sizokwenza njengenkampani.”
UMoloko wengeze ngokuthi njengoba intengo kaphethiloli inyuka njalo eNingizimu Afrika kanye nokucinywa kukagesi kubukeka kusekude nokuphela. Lokhu kungashintsha umdlalo kumabhizinisi amaningi.
“Kungasiza kakhulu ngoba njengamanje njengezwe sibhekene nengwadla yokucishwa kukagesi kanti imikhakha ebhekene nalokhu yizinkampani ezizimele nezinye izikhungo zikahulumeni njengemitholampilo nezikole zenu. Bahlupheka kakhulu ngenxa yalokhu kucishwa kukagesi.”