EzikaMaMkhize zinomdlalo ozoba ngonzima naMakhosi


Isethubeni lokuqopha umlando kuNedbank Cup, iRoyal AM, ephethwe yisiqumama saseThekwini, uShauwn “MaMkhize” Mkhize.
NgeSonto libumbene elesi-6 ebusuku iThwihli Thwahla izodudulana neKaizer Chiefs emdlalweni we-quarterfinal yeNedbank Cup eChatsworth Stadium, eThekwini.
EzikaMaMkhize seziyithemba lokugcina lesifundazwe iKwaZulu-Natal kulo mqhudelwano ohambisana nebhonasi yokuyodlala kuCaf Confederation Cup eqenjini elisuke lidle ubhedu.
Emlandweni webhola eKZN alikho iqembu esalake laba ngompetha beNedbank Cup eyasungulwa ngowe-1971. Ngesikhathi usungulwa lo mqhudelwano wawudume ngeleLife Challenge Cup.
Amaqembu aseKZN afinyelela kweyamanqamu iminyaka emithathu ilandelana ngo-1972, 1973 nangowe-1974.
IZulu Royals yavithizwa yiKaizer Chiefs ngo 4-1 ngowe-1972 kowamanqamu weLife Challenge Cup. Ngonyaka olandelayo yakhala ngaphansi kwezinye izinkunzi zaseSoweto, i-Orlando Pirates. Yaqunjwa phansi ngo 5-2.
Ifu elimnyama laphinde lasigubezela isifundazwe saKwaZulu-Natal ngo-1973. EZimnyama zathela othulini AmaZulu FC ngegoli elilodwa.
Ngemuva kwemizamo yoSuthu yokuletha injuabulo kubathandi bakanobhutshuzwayo eKZN kuke kwacweba iziziba amaqembu aseKZN ehlulwa wukufinyelela kowamanqamu.
Kuphele iminyaka eyishuminanye kungekho iqembu elidabuka kwelikaMthaniya eliqubula le ndebe noma elingena kowamanqamu.
Ngo-1985, i-African Wanderers yagilwa yiBlomfontein Celtic kowamanqamu. Ngonyaka ofanayo lo mqhudelwano wawusuwaziwa ngeMainstay Cup.
Amakhosi aqhubekile nokuma endleleni yamaqembu asuka eKZN ngo-1987 ehlula Usuthu ngo 1-0 kowamanqamu.
Ukuzabalaza koSuthu kulo mqhudelwano kuqhubeke njalo. Ngowe-1990, luphinde lalahlwa elakubo lushaywa yiJomo Cosmos ngo 1-0 kowamanqamu.
IManning Rangers ephethe irekhodi lokuba yiqembu lokuqala kusukelwa kwasungulwa iNational Soccer League (NSL) ngo-1995/96 ihlabane ngelinye ithuba lokuzifaka emlandweni. Ifinyelele kowamanqamu we-ABSA Cup. Leli qembu belibheke ukuba ngelokuqala eKZN ukubeka izandla zayo kulo mqhudelwano.
Nokho kuphinde kwayibhedela iKZN iphazanyiswa ngelinye iqembu laseSoweto futhi. IRangers ishaywe yiMoroka Swallows ngo 3-1 ngaphansi kobuholi bukaSteve Komphela.