Iyabonakala imivuzo yokufaka abadlali abayikusasa
Kuye ngamagama enkehli ezikaBroos zingena ngembobo yenaliti ku-Afcon
Umqeqeshi weBafana Bafana uHugo Broos usifezile isethembiso sakhe ngokuphendlela iNingizimu Afrika indawo ku-Africa Cup of Nations (Afcon) ezoba se-Ivory Coast ngoMasingana.
Ngemuva kokuhluleka wukuzibekisela indawo eNdebeni yoMhlaba ebibanjelwe eQatar ngonyaka odlule, uBroos wazibopha ngentambo elibeka ngembaba elokuthi iSouth African Football Association (Safa) kufanele imkhombe indlela uma ehluleka wukufaka iBafana ku-Afcon.
Nangempela usifezile isithembiso sakhe eqoqa amaphuzu amane kuLiberia. IBafana idlale ngokulingana ngo 2-2 naleli zwe e-Orlando Stadium yase ilibhincisela nxanye ngo 2-1 eMonrovia.
Intatheli yelaboHlanga ibheka okuhle namabhawodi asaxega ngaphansi kukaBroos.
Unika abadlali abayikusasa lezwe amathuba kwelesizwe:
- Siphephelo Sithole (24):
Usephenduke insika esiswini seBafana kusukela uBroos emnike ithuba lokuzibonakalisa. Unethuba lokudlala kweyoMhlaba ngo-2026 nango-2030. Iminyaka iyamvuma.
- Lyle Foster (22):
Uvutha engabaselwe phambi kwamapali. Kweyokuhlunga ubasele enethini amagoli amathathu emidlalweni emithathu. Omunye unethuba lokudlala kweyoMhlaba ngo-2026 nango-2030.
- Bongokuhle Hlongwane (23):
Uthuthuka ngesivinini. Usephenduke isithenjwa kwelesizwe. Ijubane yilona elimenza ingozi.
- Teboho Mokoena (24):
Ukudlala kuCaf Champions League neMamelodi Sundowns kumkhulise kakhulu. Yingakho engasasali eqenjini lesizwe.
- Luke Le Roux (24):
Akadlalanga kahle sibhekene neLiberia kowokuqala kodwa amaphutha akhe azomkhulisa. Uyikusasa lesizwe.
- Cassius Mailula (21):
Akakalitholi ithuba elanele kodwa usazoba yingozi uma eke wangena kahle egiyeni. Omunye esizodla ngaye.
Akagayelwa mphako ekhaya:
1. Owokuhlungela i-Afcon:
Bafana 2-2 Liberia
2. Owesihle:
Bafana 1-1 Angola
3. Owesihle:
Bafana 2-1 Mozambique
4. Owokuhlungela iNdebe yoMhlaba:
Bafana 1-0 Zimbabwe
5. Owokuhlungela iNdebe yoMhlaba:
Bafana 1-0 Ethiopia
6. Owokuhlungela iNdebe yoMhlaba:
Bafana 1-0 Ghana
7. Owesihle:
Bafana 4-0 Serria Leone
8. Owesihle:
Bafana 1-0 Botswana
Iqembu lakhe liyalwa ekuhambeni:
1. Eyokuhlungela i-Afcon:
Liberia 1-2 Bafana
2. Eyokuhlungela i-Afcon:
Morocco 2-1 Bafana
3. Eyokuhlungela iNdebe yoMhlaba:
Ethiopia 1-3 Bafana
4. Eyokuhlungela iNdebe yoMhlaba:
Zimbabwe 0-0 Bafana
5. Eyokuhlungela iNdebe yoMhlaba:
Ghana 1-0 Bafana (sabanjwa inkunzi)
6. Owesihle:
Guinea 0-0 Bafana
Ongakwenza kangcono:
UBroos usahlulwe yizikhondlakhondla zamazwe selokhu ethathe umsebenzi wokucija iBafana. Ushaywe yiFrance eqede endaweni yesibili eNdebeni yoMhlaba, iMorocco iqede endaweni yesine kweyoMhlaba neGhana ephume kweyamaqoqo eyoMhlaba.
Isenzo sakhe sokubalekela abezindaba ngoLwesihlanu ngemuva kokubambana neLiberia ngo 2-2 e-Orlando Stadium asibanga sihle. Kumele afunde ukwehlisa umoya aphinde akhe ubudlelwano obuhle nabezindaba. Izintatheli zinamandla okuhambisa umyalezo esizweni. Ngakho uyabadinga abezindaba.
Abekhona kuyona yonke imiqhudelwano:
Angiyizwa le yakhe yokukhetha imiqhudelwano. Akabekhona kuyona yonke ukuze sikhulise iqembu lesizwe. Osekuqaphelekile wukuthi akabi yingxenye yeCosafa Cup neChan.
Akakhulise ubudlelwano bakhe namaqembu ePremier Soccer League:
Kumqoka ukuthi asebenzisane kahle namaqembu adlala kuleli. Phambilini uke wahilizisana neMamelodi Sundowns ne-Orlando Pirates.
Agweme ukuthi izitha zingabuyi uma sithole igoli kuqala:
Sekwenzeke amahlandla amathathu lapho izitha zibuya khona zikade zilandela emuva uma zidlala nathi. Lokhu kumele sikugweme ngoba kwenzekile sibhekene neMorocco sagcina siguqile. Kusiphindile sigadulisana neLiberia sadlala ngokulingana ngo 2-2 kade sihamba phambili ngo 2-0. NgoLwesibili kuvuke isifo esifanayo kodwa sagcina ngokunqoba ngo 2-1.