Abavumi ukuphosa ithawula abaqhathi besifazane yize kunzima
Ngenxa yothando abanalo ngesibhakela ophromotha ababili besifazane bazoqhubeka nokuqhatha, yize bebhekene nezinqinamba zokuhlela umqhudelwano wabo. Laba ophromotha nguNomvelo Magcaba-Shezi weMvelo Boxing Promotions noHlengiwe Sithole weHle-Jobe Boxing Promotions.
IMvelo Boxing Promotions neHle-Jobe Boxing Promotions ngokubambisana bahlele umqhudelwano okulindeleke ukuthi ube kusasa ngoMgqibelo, lo mqhudelwano uzobanjelwa eMgungundlovu eCity Hall kusukela ngelesibili emini.
Laba ophromotha bazoqhatha ngokuhlanganyela nje nyakenye babe sematheni ngokuqhatha izimpi ezibonakale njengezihambe phambili ayi esifundazweni iKwaZulu-Natal kuphela kodwa eNingizimu Afrika yonkana.
IMvelo Boxing Promotions nyakenye iqhathe impi yokugcina kaMoruti “Babyface” Mthalane ayebhekene kuyona noDionel Doicos wasePhilippines neyabe ikhona eMgungundlovu eCity Hall. Uma kukhulunywa ngoMthalane, kukhulunywa ngenkakha yesibhakela njengoba elwe ngaphezulu kweminyaka engama-22, ezimpini ezingama-43 azilwa kuzona wanqoba ezingama waba ngumpetha we-International Boxing Federation (IBF)
ne-International Boxing Organisation (IBO) Flyweight. Phakathi kwezimpi aseke azilwa uMthalane useke wadudulana nenkakha yasePhilippines uNotino “Fillipino Flash” Donaire wodumo lokuphatha amabhande omhlaba ezisindo ezahlukene kusukela kwi-
Flyweight kuya kwi-Featherweight ne-Bantaweight.
IHle-Jobe Boxing Promotions yona iqhathe impi kaGcina Makhoba owayebheke noRober Paradero wasePhilippines, bebanga ibhande le-World Boxing Federation (WBF) Bantamweight elabe lingaphethwe umuntu kodwa kwagcina kunqoba uMakhoba waseDundee.
UMagcaba-Shezi ekhuluma nelaboHlanga uthe: “Kube nzima kakhulu ukuhlela lezi zimpi kwazise uMnyango weZemidlalo esifundazweni awufunanga ukusilekelela, ekubeni sawubhalela incwadi. Isizathu salokho asisazi, ngoba uhlezi ufaka isandla uma kukhona izimpi ezikhona. Kodwa ngenxa yothando esinalo ngalo mdlalo izimpi senze konke okusemandleni ngokubambisana noHlengiwe Sithole ukuthi azibhuntshi izimpi” usho kanje.
Okuyibo abakwazile ukulula isandla iMi7 elekelele ngoDokotela, ama-Ambulensi nonogada.
Ngokwezimpi uthe: “Abantu abeze ngobuningi babo bezogcwalisa ihholo eMgungundlovu, zizoba seqophelweni eliphezulu izimpi. Ayikho impi ekuzoba eyosuku zonke zizobe ziseqophelweni eliphezulu” kusho uMagcaba-Shezi okhale ngokuthi kukhona konke kunesandla semfene.
Ubalule ukuthi ngoNhlaba noba ngoNtulikazi iMvelo Boxing Promotions izoziqhathela izimele yona.
UMaSithole ukhale esifanayo nesikaMagcaba-Shezi ukuthi kube nzima impela ukuhlela izimpi.
“Amazwi engiwashilo ukuthi siyimbokodo sizonqoba noma kuthiwa kunzima kanjani. Sinothando olukhulu ngalo mdlalo ngeke sivumele abantu abafuna ukuma endleleni yethu. Noma kuthiwa balwa nathi kungani bengacabangeli osomankomane abalambile, nabanti abazosebenza ngosuku lwezimpi. Ngiyambonga kakhulu uNomvelo ngokuthi angiqinise idolo, ngokweminyaka ungaphansi kwami kodwa ngokomqondo ungaphezulu kakhulu. Ngoba nanyakenye ngiqala ukuqhatha nguyena owangilekelela kakhulu” kusho uMaSithole.
Yena uthe uzoqhatha ezimele ngoNhlangulana e-Escourt.