Angikaze ngazingabaza nakancane ngefomu yami: Klassen


Amava eminyaka kukhilikithi anyuseukuzethemba kulo mdlali osethathwa njengensika yeqembu
Uphumele obala ngefomi yakhe enhle emidlalweni yosuku olulodwa umdlali wamaProteas, uHeinrich Klaasen, odlale ingcwenga yekhilikithi kulezi zinsuku.
UKlaasen uvutha engabaselwe kweyosuku olulodwa. Uqokwe njengomdlali ovelele wosuku ngoLwesibili waphinde waqokwa njengomdlali oshaye into ecokeme kuchungechunge lwemidlalo emithathu yosuku olulodwa phakathi kweWest Indies namaProteas.
Emdlaweni wesithathu phakathi kwamaProteas ne-Indies, lo mdlali weTitans wenze ezibukwayo. Ushaye ikhulu lamarun.
Ushaye ama-run ali-119 engazange aphume.
Exoxa nabezindaba ngemuva komdlalo uphumele obala ngefomu yakhe enhle kwelesizwe.
AmaProteas abambane ngo-1-1 ne-Indies kuchungechunge lwemidlalo emithathu yosuku olulodwa.
Elakuleli belilandela emuva ngo 1-0. Umdlalo wokuqala wabhuntsha ngenxa yemvula eBuffalo Park, eGqeberha ngoLwesihlanu.
Ngesonto i-Indies inqobe ngamaruns angama-48. AmaProteas abuye ngamandla kowokugcina enqoba ngamawikhethi ayisithupha.
“Ngijabule ngendlela engidlale ngayo. Indlela engibhethe ngayo angingabazi ukuthi ikleliswe eqhulwini endleleni esengike ngabhetha ngayo ngigqoke imifaniswano yelesizwe. Yebo, ukulahlekelwa ngamawikhethi ubuthaphuthaphu kuyaphazamisa kodwa njengomdlali kufanele ungavumeli lokho kungene ekhanda. Okwakho wukwenza umsebenzi noma ukufeza izinselelo osuke unikwe zona,” kuchaza uKlaasen kulandela ukuweza amaProteas ngelibanzi.
NgoLwesibili, uKlaasen uhlanganise amarun ayi-1000 emidlalweni yosuku olulodwa kusukela eqale ukudlala kwelesizwe. Bekungokwesibili ethola ikhulu lamarun emidlalweni yosuku olulodwa.
“Angikaze ngizingabaze njengomdlali. Yebo, izinto azihambanga ngendlela ebengiyilindele emdlalweni yamaTest kodwa lokho akuzange kungithene amandla. Ngikuqonda kahle ukuthi imidlalo yamaTest inzima kangakanani. Akusiniswa amahleza lapha. Njalo uma ngike ngaphuma yilapho ngibona khona ukuthi akulula kweyamaTest. Angikaze ngazingabaza. Izinto zingivumile kweyosuku olulodwa. Ngisefomini futhi ngizimisele ngokuqhubeka nokutholela izwe lami amarun kweyosuku olulodwa. Ngalokhu angisho ukuthi anginalo uthando noma ugqozi lemidlalo yosuku olulodwa. Angingabazi ukuthi nakhona ngizoyithola ifomu,” kubeka uKlaasen.
Kulo nyaka ubalwa nabadlali asebeshaye amarun amaningi emidlalwei yosuku olulodwa. Emidlalweni emine useshaye amarun angama-256. Useshaye ikhulu elilodwa no-50 owodwa okumenza abalwe nabadlali abasefomini eyisimanga emhlabeni jikelele kweyosuku olulodwa.
“Kuhlale kuyintokozo ngaso sonke isikhathi ukubeka iqembu lakho empumelelweni. Ngeneme ngokuthi ngikwazile ukufeza lokho. Njengamanje sesizogxila emidlalweni yeT20. Sizimisele ngokuqeda zonke izinhlobo zekhilikithi singayazi induku. Sidlale kahle kweyamaTest sinqoba ngo-2-0. Kweyosuku olulodwa sibambane ngo-1-1. Manje sesibheke ukunqoba uchungechunge lwemidlalo yeT20,” kusho uKlaasen.
AmaProteas neWest Indies sebezotholana phezulu emdlalweni emithathu yeT20. Umdlalo wokuqala nowesibili uzodlalelwa eSuperSport Park, ePitoli kusasa nangeSonto. Yomibili imidlalo izoqala ngehora lesibili bese kuthi owesithathu ubengoLwesibili eWanderers Stadium, eGoli. Owesithathu uzoqala ngelesithupha kusihlwa.
Ngemuva kwalokho amaProteas azobe esebhekana neHolland emidlalweni emibili emqoka yokuhlungela ukuzibekisela indawo eNdebeni yoMhlaba yosuku olulodwa ngasekupheleni konyaka.
Elakuleli lidinga ukuyinqoba yomibili le midlalo ezoyidlala neHolland ukuze izibeke ethubeni elihle lokuzitholela ithikithi elibheke kweyoMhlaba ezobanjelwa kwelaseNdiya ngasekupheleni konyaka.
Olunye uchungechunge oluzoba ngukhiye endleleni yamaProteas ebheke kwelaseNdiya ngoluphakathi kweNew Zealand neSri Lanka.
AmaProteas adinga amaBlack Caps awenzele ufefe bese wona ezenzela umsebenzi uma esedudulana neHolland.