Baqinisa ubudlelwane njengemizamo yokuhlelembela ezohwebo



UMtaka ungumbhali wezindaba zamazwe neMeneja kwi-Igunundu Agency.
ONgqongqoshe bezangaphandle baseBurkina Faso, Guinea naseMali, bonke ababuswa yizikhulu zamasosha baphakamise ubudlelwano besifunda ukuze kube lula ukuhweba kanye nokubhekana nokungavikeleki esifundeni. Lokhu bakuveze esitatimendeni esihlanganyelwe ngesonto eledlule.
Ongqongqoshe bahlangane enhlokodolobha yaseBurkina Faso i-Ouagadougou ngesonto eledlule ukudingida ukubambisana kwamazwe abo. La mazwe aseNtshonalanga Afrika abhekane nokuqunjwa phansi kombuso ngezempi kusukela ngowezi-2020, okubuyisela emuva osekuzuziwe ngaphansi kwedemokhrasi.
Ongqongqoshe bezangaphandle u-Olivia Rouamba waseBurkina Faso, uMorissansa Kouyate waseGuinea kanye no-Abdoulaye Diop waseMali baphawule ngesidingo sokusungula uhlaka lokuxhumana oluhlala njalo phakathi kwalawa mazwe.
Isixhumanisi seBamako Conakry Ouagadougou sizoba yisisekelo sokushintshisana ngophethiloli nogesi, izixhumanisi zezokuthutha, ukubambisana ekukhishweni kwezimbiwa, ukuthuthukiswa kwezindawo zasemakhaya kanye nohwebo.
La mazwe amisiwe kwi-Economic Community of West African States (ECOWAS) kanye ne-African Union ngenxa yalokho. I-ECOWAS iphinde yafaka unswinyo eGuinea naseMali ngokuhudula izinyawo ekubuyiseleni umthethosisekelo, ozosuswa kuphela uma kuhlonishwa imigomo eyabekwa ngonyaka odlule.
Ongqongqoshe bazisole lezi zinyathelo futhi bacela ukwesekwa kwezobuchwepheshe kanye nezezimali ekuguqukeni kwabo kwentando yeningi. Kube nokuketulwa umbuso kabili eMali kusukela ngowezi-2020, okukodwa eGuinea ngowezi-2021 kanye nokubili eBurkina Faso ngonyaka odlule.