Akusensuku zatshwala u-Akpeyi azitholele ikhaya elisha
Uphumela obala ngokwenza ahlale ekhaya ekubeni kunenqwaba yamaqembu afuna ukumsayinisa unozinti ozakhele igama kuKaizer Chiefs naseqenjini lesizwe laseNigeria, uDaniel Akpeyi.
Ekupheleni kwesizini edlule u-Akpeyi ufakwe ohlwini lwabadlali abachithwayo kuChiefs. Lokhu kuphoqe ukuthi athungathe ikhaya elisha. Njengamanje u-Akpeyi uzicija neSwallows ukuzigcina esisimeni esifanele.
Exoxa nelaboHlanga utshele leli phephandaba ukuthi kungani engakawutholi umsebenzi.
“Ithemba lokuthola iqembu angililahlile. Umsebenzi ngizowuthola maduze. Imeneja yami ixoxisana nenqwaba yamaqembu alapha ekhaya afuna ukungisayinisa. Njengamanje ngizilolonga neSwallows. Sekuphele izinyanga ezine ngizicija neSwallows ngenhloso yokuthi ngihlale ngisesimeni esifanele uma sengithola iqembu elisha. ISwallows ibithanda ukungisayinisa kodwa ngeke ikwazile ngenxa yokuthi idingisiwe yiFifa ekutheni ingasayinisi abadlali. Nginobudlelwano obuhle neqembu. Imeneja yami iyona engicelele ukuthi ngizicije neSwallows. Umqeqeshi weqembu u-Ernst Middendorp sisebenze kahle naye kuChiefs. Naye usekubeke kwacaca ukuthi uma kuphela isigwebo seqembu angathanda ukungisayinisa,” kubeka u-Akpeyi.
Lolu qweqwe lukanozinti ludlale kuChiefs iminyaka emithathu. Ufike eNingizimu Afrika ngowe-2015 ezodlala kuChippa United.
“Angeke ngathanda ukudalula amaqembu esikhuluma nawo kodwa kunamaqembu cishe amathathu uma singayibali iSwallows afuna ukungisayinisa. Inkinga ebhekene nala maqembu wukuthi akanaso isikhala sabadlali bangaphandle. Okwamanje ngisafana nokuthi ngingumdlali wangaphandle kwaseNingizimu Afrika yize senginalo ilungelo lokuthola ubuzwe nokuba yisakhamuzi sakuleli. Imithetho yaseNingizimu Afrika ithi kumele uhlale lapha iminyaka engaphezu kwemihlanu ukuze ukwazi ukufaka isicelo sokuba yisakhamuzi sakuleli ngokugcwele. Imenenja yami ingisizile ngakwazi ukufaka lesi sicelo. Njengamanje sesilinde amaphepha azobe esengigunyaza ukuthi ngibe yisakhamuzi sakuleli. Uma ngingathola lamaphepha ngizobe sengikwazi ukuthola umsebenzi ngoba wonke la maqembu angifunayo akanaso isikhala somdlali wangaphandle,” kusho u-Akpeyi.
ElaboHlanga lihabule izindaba zokuthi amaqembu agaqele u-Akpeyi kukhona iMarumo Gallants edonsa kanzima kuligi yeDSTV Premiership, iMaritzburg United, iSwallows naMaZulu FC
“KuMotsepe Foundation Championship akhona amaqembu amabili ake angithinta kodwa sangavumelana ngemali. Yebo, umsebenzi ngiyawudinga kodwa lokho akusho ukuthi ngizothatha noma yini. Uma ngamukela isicelo seqembu elingifunayo kumele kube yisicelo esigculisayo,” kulandisa u-Akpeyi.
Lo nozinti unesipiliyoni esiyisimanga ezingeni lomhlaba. Usedlale imidlalo eli-18 eqenjini lesizwe lama-Super Eagles. Ngonyaka wezi-2019, usize iNigeria yaqeda endaweni yesithathu ku-Africa Cup of Nations (Afcon) ebibanjelwe kwelaseGibhithe.
Ngowezi-2018 ubeseNdebeni yoMhlaba eRussia kwathi ngowezi-2016 wadlala kuma-Olympic Games ayeseRio de Jenario, eBrazil.
“Akulula ukuhlala ekhaya ngaphandle komsebenzi. Into engisizile wukuthi ngikwazile ukuthatha izinqumo ezifanele isikhathi sisavuma. Imoto engihamba ngayo angiyikhokheli kanti nomuzi wami usuqedile ukukhokha. Ngiphinde ngakwazi ukuqala namanje amabhizinisi izinto zisahamba ngendlela. Lokhu kungisizile ekutheni ngikwazi ukuziphilisa kulezi zinyanga ezedlule. Njengamanje sengibheke ukuthi ngithole amaphepha angigunyaza ukuthi ngibe yisakhamuzi sakuleli bese ngithola iqembu. Ngizimisele ngokubuyisa indawo yami eqenjini lesizwe. Ngonyaka ozayo ngifuna ukuyodlala i-Afcon neqembu lami lesizwe, iNigeria.” kuphetha u-Akpeyi.
Ukungabi naqembu sekwenze walahlekelwa yindawo yakhe kwelesizwe.