Ziyaphela ziqothwa buthule abahlaseli izintatheli
Isidumbu sentatheli edumile yaseCameroon sitholwe ngeSonto eduzane nenhloko-dolobha iYaounde ngemuva kwezinsuku ezinhlanu ithunjwe abahlaseli abangaziwa, ngokusho kwenyunyana yabezindaba kanye nozakwabo ngeSonto. Abameli bemithombo yezindaba bachaze ukunyamalala nokufa kukaMartinez Zogo njengolunye uphawu lwezingozi zokubika kulelizwe.
UZogo, ongumqondisi wesiteshi somsakazo esizimele i-Amplitude FM, wathunjwa ngoMasingana zili-17 ngabahlaseli abangaziwa ngemuva kokuzama ukungena esiteshini samaphoyisa, kusho inhlangano eqapha abezindaba iReporters Without Borders (RSF).
UZogo ubesanda kukhuluma emoyeni mayelana necala lokukhwabanisa elibandakanya umsakazo oxhumene nohulumeni, kusho iRSF. “Imithombo yezindaba yaseCameroon isanda kulahlekelwa ngomunye wamalungu ayo, oyisisulu senzondo nobuqaba,” kusho inyunyana yezintatheli zaseCameroon esitatimendeni. “Iphi inkululeko yabezindaba, inkululeko yokubeka imibono kanye nenkululeko yokukhuluma eCameroon lapho ukusebenza kwabezindaba manje kukufaka engcupheni yokufa?”
Uzakwabo, uCharlie Amie Tchouemou, uMhleli oMkhulu we-Amplitude FM, ukuqinisekisile ukushona kukaZogo nokuthunjwa kwakhe. Amaphoyisa nohulumeni abazange baphendule izicelo zokuthi baphawule. Lesi sigameko singesakamuva ochungechungeni lokuhlaselwa kwezintatheli eCameroon, okuyizwa elinemithombo yezindaba enamandla futhi elibuswa nguMengameli uPaul Biya, onomlando wamashumi eminyaka wokucindezela ukuphikiswa kwakhe.
ICameroon ingelinye lamazwe amaningi ezwenikazi lonke, kusukela eBurkina Faso kuya e-Ethiopia kuya e-Equatorial Guinea, lapho izintatheli zikhala ngokuthi inkululeko yabezindaba isengcupheni yohulumeni obacindezelayo.
“Nakuba iCameroon inomunye wemithombo yezindaba ecebe kakhulu e-Afrika, ingelinye lamazwe ayingozi kakhulu ezintathelini zezwekazi, ezisebenza endaweni enenzondo neyingozi,” kusho iRSF kuphrofayela yezwe laseCameroon.
Intatheli yeRadio France Internationale u-Ahmed Abba waboshwa ngoNtulikazi wezi-2015 wagqunywa ejele iminyaka emibili ngamacala obushokobezi izinhlangano ezilwela amalungelo eziwagxeke njengenkohliso.
